काँग्रेसको क्रियाशील सदस्यता वितरण र नवीकरण स्थगित

काठमाडौं । प्रमुख प्रतिपक्षी दल काँग्रेसले वितरण गर्दै आएको क्रियाशील सदस्यता र नवीकरण कार्य स्थगन भएको जनाएको छ । पार्टी प्रवक्ता विश्वप्रकाश शर्माले कोभिड–१९ को सङ्क्रमण बढ्दै गएको र नेपालमा पनि हुनसक्ने सङ्क्रमणलाई मध्यनजर गर्दै चैत ९ गतेदेखि चैत मसान्तसम्मका लागि स्थगन गरेको जनाएका छन ।

ुपार्टीले ठूला भेला र सम्मेलनलाई यसअघि नै स्थगन गरेको, कोभिड–१९ को सङ्क्रमणलाई ध्यानमा राखेर क्रियाशील सदस्यता वितरण र नवीकरणलाई स्थगन गरेका हौँु, उनले भने ।

काँग्रेसले शहरदेखि गाउँ हुँदै घरसम्म कोरोना भाइरससम्बन्धी जनचेतना फैलाउन सबै लाग्ने बताएको छ । पार्टी प्रवक्ता शर्माले जिल्ला, क्षेत्र, नगर, गाउँ हुँदै टोलसम्म कोरोना जोखिम सामना गर्ने राष्ट्रिय दायित्व निर्वाहका लागि स्वयंसेवी भूमिका निभाउन सबैलाई आग्रह गरिएको बताए ।

काँग्रेसले सचेतना अभियानमा सञ्चारका विविध माध्यमको प्रयोगमा तीव्रता दिने बताएको छ । केन्द्रीय कार्यालय भने बन्द नरहने काँग्रेसले जनाएको छ ।