भारतले गर्यो इरानबाट २७७ आफ्ना नागरिकको उद्धार

नयाँदिल्ली । कोरोनाभाइरसबाट निकै प्रभावित मानिएको इरानमा अलपत्र परेका दुई सय ७७ जना भारतीय नागरिकलाई हवाई जहाजबाट उद्धार गरिएको छ । महान एयरको बिमानबाट उद्धार गरिएका उनीहरु बुधबार बिहान नयाँदिल्ली विमानस्थलमा उत्रिएका थिए ।

उद्धार गरिएका सबै यात्रुलाई एयर इन्डियाका दुई वटा विमानबाट क्वारेन्टाइनमा राख्न जयपुर पठाइएको विमानस्थलका अधिकारीहरुले बताएका छन् । उद्धार गरिएकामा १२८ जना पुरुष र १४९ जना महिला छन् ।

विश्व स्वास्थ्य संगठनका अनुसार खाडी राष्ट्र इरानमा २५ हजारभन्दा बढी मानिसमा कोरोनाको संक्रमण देखिएको छ । एक हजार ९३४ जनाको मृत्यु भइसकेको छ ।

महान एयरले इरानमा अलपत्र परेका भारतीय नागरिकलाई मानवीय दृष्टिकोणबाट निःशुल्क सुरक्षित उद्धार गर्ने घोषणा गरेको थियो ।