एसईईमा नायिका करिश्मा र शान्ता चौधरी पास

काठमाडौं । बिहीबार प्रकाशित एसईई परीक्षाको नतिजामा सदाबहार अभिनेत्री करिश्मा मानन्धर र नेकपाकी नेता शान्ता चौधरी उत्तिर्ण भएका छन् ।

अभिनेत्री मानन्धरले ‘बी’ प्लस ल्याएकी छन् भने नेतृ शान्ता चौधरीले ‘बी’ ग्रेड ल्याएर एसईई पास गरकी छन् । नतिजाअनुसार करिश्माले जीपीए ३ ल्याएकी छन् भने शान्ताले २.६५ ल्याएकी छन् ।

राष्ट्रिय परीक्षा बोर्डले बिहीबार माध्यमिक शिक्षा परीक्षा एसईईको नतिजा सार्वजनिक गरेको हो । यस वर्षको परीक्षामा देशभरबाट कुल ४ लाख ७५ हजार ३ परीक्षार्थी सहभागी भएका थिए । यस वर्ष एसईईमा साधारणतर्फ ४ लाख ४९ हजार ६ सय ४२ र प्राविधिकतर्फ ९ हजार ६ सय ३३ परीक्षार्थी सहभागी भएका थिए ।

गत १० चैतबाट २१ गतेसम्म परीक्षा सञ्चालन भएको थियो । तीमध्ये २ लाख ३६ हजार ४ सय ४५ छात्र र २ लाख ३८ हजार ५ सय ५८ छात्रा परीक्षार्थी छन् ।