चितवनका विभिन्न अस्पतालमा आठ जना कोरोना सङ्क्रमितको निधन

चितवन। चितवनका विभिन्न अस्पतालमा उपचारका क्रममा आठ जना कोरोना सङ्क्रमितको मृत्यु भएको छ।

भरतपुर अस्पताल, चितवन मेडिकल कलेज र पुरानो मेडिकल कलेजमा उनीहरुको मृत्यु भएको हो।

मृत्यु हुनेमा चितवनका दुई र अन्य बाहिरी जिल्लाका रहेका छन्। भरतपुर अस्पतालमा मृत्यु हुनेमा भरतपुर महानगरपालिका ९ का ३८ वर्षीय पुरुषको उपचारका क्रममा मृत्यु भएको हो।

निमोनिया र ज्वरोका कारण यही वैशाख २६ गते अस्पताल भर्ना भएका उनमा २४ गते कोरोना सङ्क्रमण पुष्टि भएको थियो। अस्पताल भर्ना भएसँगै कोभिड सघन उपचार कक्षमा उपचारका क्रममा उनको आज बिहान सात बजे बजे मृत्यु भएको हो।

सोही अस्पतालमा उपचारका क्रममा सर्लाहीको लालबन्दी नगरपालिका ७ का ७३ वर्षीया सङ्क्रमितको मृत्यु भएको छ। निमोनिया र ज्वरोका कारण यही वैशाख २६ गते अस्पताल भर्ना भएकी उनमा २७ गते कोरोना सङ्क्रमण पुष्टि भएको थियो। सघन उपचार कक्षमा उपचारका क्रममा उनको आज बिहान ४ः४४ बजे मृत्यु भएको अस्पतालले जनाएको छ।

पुरानो मेडिकल कलेजमा उपचाररत बाराको निजगढका ६५ वर्षीया वृद्धाको कोरोना सङ्क्रमणका कारण मृत्यु भएको छ। निमोनियाका कारण वैशाख २१ गते अस्पताल भर्ना भएकी उनमा २२ गते कोरोना सङ्क्रमण पुष्टि भएको थियो। कोभिड सघन उपचार कक्षमा उपचारका क्रममा उनको आज बिहान ४ः२६ बजे मृत्यु भएको हो।

चितवन मेडिकल कलेजमा उपचारका क्रममा भरतपुर २४ की ५७ वर्षीया महिलाको मृत्यु भएको छ। निमोनियाका कारण उपचारका लागि यही वैशाख १३ गते अस्पताल भर्ना भएकी उनको कोभिड सघन उपचार कक्षमा उपचारका क्रममा आज बिहान ३ः५९ बजे मृत्यु भएको हो।

सोही मेडिकल कलेजमा उपचारका क्रममा गुल्मीको दरबारदेवस्थल गाउँपालिका ७ का ५० वर्षीय पुरुषको मृत्यु भएको छ। निमोनियाका कारण वैशाख २५ गते अस्पतालमा भर्ना भएका उनको कोभिड सघन उपचार कक्षमा उपचारका क्रममा आज बिहान १ः३९ बजे मृत्यु भएको अस्पतालले जनाएको छ।

नवलपरासी (वर्दघाट–सुस्ता पश्चिम) सुनौलका ४० वर्षीय पुरुषको उपचारका क्रममा मृत्यु भएको छ। निमोनियाको समस्या भई यही वैशाख २४ गते चितवन मेडिकल कलेजमा भर्ना भएका उनको कोभिड सघन उपचार कक्षमा उपचारका क्रममा आज बिहान १ः५३ बजे मृत्यु भएको हो।

भरतपुर अस्पतालमा उपचाररत गुल्मी मुसिकोट गाउँपालिका ९ का ५७ वर्षीय पुरुषको कोरोना सङ्क्रमणका कारण मृत्यु भएको छ। निमोनियाको समस्या भई वैशाख २२ गते अस्पतालमा भर्ना भएका उनको सघन उपचार कक्षमा उपचारका क्रममा मङ्गलबार राति ११ः५ बजे मृत्यु भएको हो।

पुरानो मेडिकल कलेजमा उपचारका क्रममा गुल्मीको रेसुङ्गा नगरपालिकाका ७ का ६१ वर्षीय वृद्धको कोरोना सङ्क्रमितको मृत्यु भएको छ। निमोनियाका कारण वैशाख २४ गते अस्पताल भर्ना भएका उनको कोभिड सघन उपचार कक्षमा उपचारका क्रममा मङ्गलबार राति १०ः३० बजे मृत्यु भएको हो।