पोखरा महानगरपालिकालाई स्वास्थ्य सामग्री प्रदान

काठमाडौं । चीनको नानिङ शहरले पोखरा महानगरपालिकालाई रु. २० लाख बराबरको स्वास्थ्य सामग्री प्रदान गरेको छ । पोखरा पर्यटन परिषद् र चाइना ओभरसिज एशोसिएशनको समन्वयमा ल्याइएको उक्त सामग्री महानगरपालिकालाई उपलब्ध गराएको हो ।

स्वास्थ्य सामग्री महानगरपालिका परिसरमा परिषद्का अध्यक्ष गोपीबहादुर भट्टराईले उपप्रमुख मञ्जुदेवी गुरुङलाई हस्तान्तरण गरेका हुन् । उपप्रमुख गुरुङले महानगरपालिकाले १३ अन्तर्राष्ट्रिय सम्बन्धमध्ये नौ चीनका विभिन्न शहरसँग भएको जानकारी गराएकी थिइन् ।

२०७४ पुस २६ गते महानगरपालिका र चीनको नानिङ शहरबीच भगिनी सम्बन्ध रहेको जनाउँदै उनले प्राप्त सामग्रीले कोरोना महामारी रोकथाम र नियन्त्रणमा सहयोग पुग्ने वचनवद्धता व्यक्त गरिन् । उनले नानिङ शहरका प्रमुखलाई धन्यावाद पत्र पठाउँदै कोरोना सहज भएपछि पोखरा भम्रणको आमन्त्रण समेत गर्न भ्याइन् ।

महामारी नियन्त्रणमा सबैको साथ र सहयोग आवश्यक रहेको बताउँदै गुरुङले प्राप्त सामग्रीलाई आवश्यकता अनुसार अस्पताललाई वितरण गर्ने जानकारी गराइन् । परिषद्का अध्यक्ष भट्टराईले उक्त शहर चीनको नमूना शहर भएको जनाउँदै भगिनी सम्बन्ध स्थापित शहरको साथ र सहयोगले आगामी दिनमा पर्यटन प्रवद्र्धनमासमेत सहयोग पुग्ने ठोकुवा ।

उनका अनुसार स्वास्थ्य सामग्री अन्तर्गत पाँच अक्सिजन कन्सन्टेटर मेसिन, मेडिकल मास्क २० हजार थान, पिपिई सेट ५०० थान, मेडिकल पञ्जा पाँच हजार प्राप्त भएको छ । रेवानका उपाध्यक्ष नरेश भट्टराईले चीनका विभिन्न शहरसँग भएको भगिनी सम्बन्धले दुई देशबीचको सम्बन्धलाई अझ गाडा बनाएको छ ।

कोराना रोकथाम र नियन्त्रणमा प्राप्त स्वास्थ्य सामग्रीले उपचारमा सहज हुने बताए । कार्यक्रममा चाइना ओभरसिज एशोसियशनका अध्यक्ष चाङ र सचिव साङसावो (सन्देश), महानगरपालिकाका विभिन्न वडाका वडाध्यक्षहरुको सहभागितो रहेको थियो ।