प्रधानमन्त्री देउवासँग बेलायतका लर्डसहरुको भेटवार्ता

लण्डन : प्रधानमन्त्री शेरबहादुर देउवासँग संयुक्त अधिराज्यको माथिल्लो सदन हाउस अफ लर्डसका लर्डस स्वराज पल, लर्डस शेख र लेडी शेखले शिष्टाचार भेटवार्ता गर्नुभएको छ ।

यहाँस्थित नेपाली राजदूताबासमा आज विहान भएको भेटमा उहाँहरुले प्रधानमन्त्री देउवाको कार्यकालमा नेपाल–बेलायत सम्बन्ध थप सुदृढ हुने विश्वास व्यक्त गर्नुभएको भेटमा सहभागी परराष्ट्र मन्त्रालयका सचिव भरतराज पौड्यालले जानकारी दिनुभयो ।

द्विपक्षीय सम्बन्धका जानकार तथा चिरपरिचित उहाँहरुले सम्बन्ध सुदृढ गर्न आफूहहरुको सबै प्रकारको सहयोग सदभाव् रहिरहने विश्वास दिलाउनुभयो । उहाँहरु बेलायतको संसदमा नेपालका समस्या र सहयोग गर्ने विषयमा आवाज उठाउँदै आउनुभएको छ ।

सो अवसरमा प्रधानमन्त्री देउवाले द्विपक्षीय सम्बन्ध र त्यसलाई प्रबद्र्धन गर्ने सम्बन्धमा धारणा व्यक्त गर्दै बेलायत सरकारले नेपाललाई गर्दै आएको सहयोगको सह्ना गर्नुभयो । भेटमा नेपालका तर्फबाट वन तथा वातावरण मन्त्री रामसहाय प्रसाद यादव, परराष्ट्र सचिव पौड्याल, शिष्टाचार महापाल डा दुर्गाबहादुर सुवेदी, यहाँस्थित नेपालका कार्यवाहक राजदूत रोशन खनाललगायत हुनुुहुन्थ्यो ।

नोभेम्बर १ र २ मा संयुक्त अधिराज्यको ग्लास्गोमा हुने जलवायु परिवर्तनसम्बन्धी संयुक्त राष्ट्रसङ्घीय संरचना महासन्धिको पक्ष राष्ट्रको २६औँ सम्मेलन (कोप–२६) अन्तर्गतको वल्र्ड लिडर समिटका लागि नेपाली प्रतिनिधिमण्डलको नेतृत्व गर्दै शुक्रबार राति लण्डन आइपुग्नुभएको हो । प्रधानमन्त्री देउवा नेतृत्वको प्रतिनिधिमण्डल शनिबार र आइतबार यही रहनुहुने र विभिन्न भेटवार्ता तथा कार्यक्रममा व्यस्त रहनुहुने कार्यतालिका रहेको मन्त्रालयले जनाएको छ ।