कृषिप्रधान देशमा मल छैन किसानलाई

झापा । गौरादहका कृषक धान पोटाउने बेला भइसक्दा पनि युरिया मल नपाउँदा समस्यामा परेका छन् ।

धान रोप्ने समयमा डिएपी मल नपाएर समस्यामा परेका उनीहरु अहिले युरिया मल नपाउँदा थप मारमा परेका हुन् । गौरादह नगरपालिका–२ का कृषक मित्रबहादुर बस्नेतले युरिया मल नपाउँदा समस्या भएको गुनासो गर्दै भने, ‘पहिलेदेखि नै रासायनिक मल प्रयोग गरियो अहिले अरु मल हाले राम्रो फल्दैन, रासायनिक मल नपाएर समस्या भयो ।’

‘’कृषिप्रधान देश भए पनि किसान जहिल्यै पनि मर्कामा पर्ने गरेका छन्, ‘  उनले भने, ‘यो विषयमा सरकारले ध्यान दिनुपर्छ ।’

गौरादह–७ कै अर्का कृषक वेदप्रसाद चुँडालले बाली लगाउने समयदेखि उठाउने समयसम्म आफूहरु समस्यामा पर्ने गरेको बताए । बाली लगाउने समयमा मल–बिउ नै पाइदैन यस्ता समस्या धेरै छन्, समाधानका लागि कतैबाट पहल हुँदैन उनले भने ।

कृषि सामग्री संस्थान र साल्टट्रेडिङ कम्पनीबाट झापाका दक्षिणी क्षेत्रका डिलरलाई युरिया मल आए पनि त्यो पर्याप्त छैन् । थोरै मात्रामा मल आउँँदा कृषकले गाडीबाटै मल उठाएर लाने गरेका छन् ।