प्रणयपथ र काले दमाई लोकार्पण

इलाम । कवि वालिका थपलियाको कविता संग्रह ‘प्रणयपथ’ र डा देवी क्षेत्री दुलालद्वरा लिखित नाटक ‘काले दमाई’ लोकर्पण भएको छ । चेतना नाट्य समुहको आयोजनामा इलाम सदरमुकाममा भएको कार्यक्रममा प्रा.डा. गोविन्दराज भट्टराईले दुवै कृतिको विमोचन गरेका हुन् ।

डा. दुलालको काले दमाई १८ औँ कृति हो भने थपलियाको पहिलो कविता संग्रह हो । थपलियाले दुईवटा जीवनी नेपालीमा अनुवाद गरेकी छिन् । नेलसन मण्डेला र हेलेन केलको जीवनीको नेपालीभाषा अनुवाद गरेकी हुन् । कविता संग्रहमा एक सय तीन कविता रहेका छन् । डा. दुलाले नेपाली राणाकालीन समयका समाजसेवी काले दमाईका बारेमा नाटक लेखेका हुन् ।

पुस्तकको बिमोचन गर्दै प्रा.डा जोशीले काले दमाई नाट्यकृति फरक धारको साहित्यिक कृति रहेको उल्लेख गरे । ‘यो कृतिले इतिहासलाई जीवन्त बनाएको छ’, उनले भने, ‘फरक धारको साहित्य अध्ययन गर्नेहरुले यो कृतिलाई छाडे अध्ययनै अपुरो हुनेछ ।’ थपलियामा भाषाको राम्रो दख्खल भएको उनको कृतिमा समावेश भएका कविता सशक्त भएको टिप्पणी गरे ।

‘थपलियााको कविता संग्रहमा रहेका कविताले प्रेमका गहिरो अुभूति गराउँछ’, उनले थपे, ‘कविता लेखनमा शक्ति छ ।’ विमोचन कार्यक्रममा कवि थपलियाले ‘अक्षरको अंकुरण’ शिर्षकको कविता बाचन गरेकी थिइन । डा। दुलालले नाटकमा भएको संवाद सुनाएका थिए । दुवै कृतिमाथि रविमान लम्जेलले टिप्पणी गरेका थिए ।

कार्यक्रममा प्राडा अञ्जना अवस्थी, व्यञ्जना शर्मा, लेखक मुक्ति बराल, युद्धप्रसाद वैद्य, विमल वैद्यलगायतले लेखकका बारेमा बोलेका थिए । कार्यक्रम चेतना नाट्य समुहका अध्यक्ष सुरेश पोर्तेलको अध्यक्षतामा भएको हो ।