मस्र्याङ्दीमा छाडिए पौने एक लाख माछाका भुरा

लमजुङ । मस्र्याङ्दी खोलामा माछा लोप हुन थालेपछि ५७ हजार माछाका भुरा छाडिएको छ । आज बेँसीशहर नगरपालिका–१ दलालमा रहेको ७० मेगावाटको मध्यमस्र्याङ्दी जलविद्युत् आयोजनाले नदीमा माछा छाडेको हो ।

मध्यमस्र्याङ्दी आयोजना निर्माणका क्रममा बाँधमा माछा आउजाउ गर्न मिल्ने गरी संरचना नबनाइएकाले तल्लो भेगको उपल्लो भेगमा माछा आउन नसकेपछि माथिल्लो भेगको ह्यचरीमा भुरा छाडिएको आयोजना केन्द्र प्रमुख शिवकुमार शाहले बताए । उनले भने, ‘यहाँ वातावरणमा प्रभाव परेकाले माछा लोप हुँदै गएका र लोप हुनबाट जोगाउनका लागि माछाको उत्पादन गर्ने लक्ष्यले भुरा माछा छाडेका छौँ । गर्दी, हाडे, ठेड गरी तीन जातका माछा नदीमा छाडेको आयोजनाले जनाएको छ ।

स्याङ्जामा रहेको कालीगण्डकी ‘ए’ जलविद्युत् केन्द्रमा रहेको माछा ल्याएर छाडिएको आयोजना केन्द्र प्रमुख शाहले बताए । चार वर्षयता यहाँ पहिलो पटक माछाका भुरा नदीमा छाडेको आयोजनाले जनाएको छ । वर्खामा ड्याम साइडको गेट खोलेका बेलामा भने तलका माथि र माथि रहेका माछा तल आउजाउ गर्न सक्ने बताइएको छ ।

सन् २००० मा निर्माण कार्य थालनी गरेर सन् २००८ मा निर्माण कार्य सम्पन्न भएसँगै आयोजनाबाट विद्युत् उत्पादन शुरु भएको थियो । आयोजना २७ अर्ब २० करोड लगानीमा निर्माण भएको थियो ।