काठमाडौंमा विश्व हिन्दी दिवसः २५ नेपाली कथाकारका कथा हिन्दीमा अनुवाद, प्रेमचन्दका पाँच कथा नेपालीमा पढ्न पाइने

अक्षरपाटी संवाददाता

काठमाडौं । काठमाडौंस्थित भारतीय राजदूतावास तथा त्रिभुवन विश्वविद्यालय अन्र्तगतको हिन्दी केन्द्रीय विभागले होटेल याक एन्ड यतिमा विश्व हिन्दी दिवस कनाएको छ । समारोहमासङ्घीय मामिला तथा सामान्य प्रशासन मन्त्री हृदयेश त्रिपाठी प्रमुख अतिथि थिए । कार्यक्रमका अवसरमा कार्यवाहक राजदूत डा. अजय कुमारले भारतका प्रधानमन्त्री नरेन्द्र मोदीको सन्देश पढेर सुनाएका थिए ।

समारोहमा हिन्दी केन्द्रीय विभागको शोधपत्रिका ‘साहित्यलोक’ को विशेषाङ्क लोकार्पण गरिएको थियो । वीपी कोइराला नेपाल–भारत फाउन्डेसन, भारतीय राजदूतावासको सहयोगमा प्रकाशित दुई हिन्दी तथा दुई नेपाली पुस्तककोसमेत कार्यक्रममा लोकार्पण गरिएको थियो ।

सार्वजनिक गरिएका पुस्तकहरुमा हिन्दी केन्द्रीय विभागका विद्यार्थीद्वारा नेपालीमा अनुवाद गरिएका विश्व प्रसिद्ध हिन्दी कथाकार प्रेमचन्दद्वारा लिखित पाँच प्रसिद्व कथा एवम् नेपालीमै अनुवाद गरिएको स्वामी विवेकानन्दको प्रसिद्ध पुस्तक ‘कर्मयोग’ समावेश छन् ।

हिन्दीमा अनुवाद गरिएका नेपालका राष्ट्र कवि माधवप्रसाद घिमिरेद्वारा रचित गीति नाटक ‘अश्वत्थामा’ एवम् युवा तथा नयाँ नेपाली कथाकारद्वारा लेखिएका २५ आधुनिक नेपाली कथाको अनुवादित सङ्ग्रह ‘उत्कृष्ट कहानियां’ को पनि लोकार्पण गरियो । यी कथाहरु बाह्रखरी मिडियाले नेपालभर आयोजना गरेको कथा लेखन प्रतियोगीताबाट छानिएका थिए ।

सो समारोहमा स्वामी विवेकानन्द साँस्कृतिक केन्दका कलाकारले प्रख्यात हिन्दी कविहरुका रचनाको साङ्गीतिक प्रस्तुति दिएका थिए । लेखक, पत्रकार, हिन्दी तथा नेपाली बुद्दिजीवी, प्राज्ञ र विद्यार्थी लगायतको कार्यक्रममा सहभागिता थियो ।