मनोमानी भाडा असुली, बैतडीमा यात्रु हैरान

बैतडी । ट्राफिक प्रहरीले जिल्लामा सञ्चालित जिपबाट सिट हटाएसँगै यात्रुलाई सास्ती भएको छ । ट्राफिक प्रहरीले अनुमतिभन्दा बढी राखिएका बोलेरो जिपको पछाडिका सिट हटाएपछि यात्रु दोब्बर भाडा तिरेर यात्रा गर्न बाध्य छन् ।

सवारीसाधन सञ्चालकले नियमविपरीत जिपमा पछाडि सिट थपेकोमा जिल्ला ट्राफिक प्रहरी कार्यालयले जिल्लामा चल्ने ८० भन्दा बढी जिपका सिट झिक्न लगाएको थियो । यसअघि बोलेरो जिपले १५ जनासम्म यात्रु बोक्ने गरेकामा अहिले पाँच जना मात्र बोक्नुपर्ने भएको छ । त्यसो हुँदा उनीहरुले मनोमानी भाडा लिन थालेका हुन् ।

एउटा जिपमा पाँच जना मात्र बोक्न पाइने भएपछि आवतजावत गर्न निकै मुश्किल भएको दशरथचन्द नगरपालिका–४ का चन्द्रप्रकाश लोहिया बताउनुहुन्छ । “गाडी कुर्दाकुर्दै दिन बित्छ,” उनले भने, “बसपार्कबाटै जिप नचढे यात्रा गर्नै सकिन्न ।” सुर्नया–३ की पवित्रा भट्ट जिपले चर्को भाडा असुल्ने गरेको बताउँछिन् ।

गोकुलेश्वरदेखि गन्नासम्मको भाडा १०० भए पनि अहिले २५० सम्म लिने गरेको स्थानीयवासी गङ्गासागर जोशीको गुनासो छ । सीमित मात्रामा चल्ने जिपले यात्रुबाट महङ्गो भाडा असुलिरहेको जोशी बताउँछन् । प्रमुख जिल्ला अधिकारी चन्द्रप्रसाद गैरे बढी भाडा असुल्नेलाई कारवाही गरिने बताउँछन् ।

सम्भावित दुर्घटना न्यूनिकरण गर्न थप गरिएका जिपका सिट हटाउन लगाइएको जिल्ला ट्राफिक प्रहरी कार्यालयका प्रहरी प्रमुख प्रहरी सहायक निरीक्षक आकाश रावलले बताए । पाँच सिट क्षमताको जिपमा १५ जनासम्म यात्रुसँगै सामान बोक्दा दुर्घटना धेरै हुने गरेको उनको भनाइ छ ।

पहिला दुर्घटना हुँदा यातायात कम्पनीले क्षतिपूर्ति दिने व्यवस्था भए पनि अहिले सरकारले यातायातमा सिन्डिकेट हटाएपछि दुर्घटनामा परेका यात्रुले क्षतिपूर्ति पाउन सकेका छैनन् । जिल्लामा दुर्घटना हुँदा प्रहरी प्रमुखदेखि सिडियोसम्मले स्पस्टीकरण दिनुपर्ने हुन्छ ।