किन मारिन्छन् गाईः बैतडीमा रहस्यमय अवस्थामा ११ गाई मृत फेला

बैतडी । बैतडीमा शुक्रबार ११ वटा गाई मरेको अवस्थामा भेटिएका छन्। पुर्चौंडी नगरपालिका ६ स्थित सिगास सामुदायिक वन क्षेत्रमा भेरीखोला मुहानमा मृत गाई फेला परेका हुन्।

बैतडीका प्रहरी प्रमुख नारायणप्रसाद अधिकारीले गाई मृतावस्थामा फेला परेको भन्ने स्थानीयवासीले खबर गरेको र प्रहरी टोली गइरहेको बताए।

पुर्चौंडी ६ को मुडेलीका ८० घरपरिवार र एक विद्यालयले त्यही मुहानको पानी प्रयोग गर्दै आएका थिए। गाउँमा आउने खानेपानीको मुहानमा मृत गाई भेटिएपछि खानेपानीको समस्या भएको स्थानीयवासी सीता साउदले बताइन्।

भनिन्, ‘पानीको मुहानमै गाई मरेका हुँदा खानेपानीको निकै समस्या भएको छ। त्यो ठाउँमा दुर्गन्धसमेत फैलिएको छ।’

नगरपालिकाको कुवाकोट–सुवालेक सडकखण्ड नजीकै रहेको पानीको मुहानमा गाई मृतावस्थामा भेटिएकाले सडकबाटै फालिएको हुन सक्ने स्थानीयवासीले अनुमान गरेका छन्।

‘गाई फालेर मारेको हुन सक्ने अनुमान गरेका छौँ,’ स्थानीयवासी प्रेम साउँदले भने, ‘पानीको मूहानमा गाई मरेको भेटिएपछि गाउँ र विद्यालयमा खानेपानीको समस्या भएको छ।’

मुडेलीस्थित पञ्चकन्या आधारभूत विद्यालयका बालबालिकालाई खानेपानीको समस्या भएको छ। मरेका गाई पाटन नगरपालिकाबाट पुर्चौंडीकै लक्ष्मण पार्की र सुरेन्द्र पार्कीले लगेको बुझिएको छ।

पाटन नगरपालिकाले छाडा गाईगोरु व्यवस्थापनका लागि प्रतिगाई दुई हजार ५०० का दरले ती व्यक्तिको जिम्मा लगाएको र उनीहरुले ताक्लाकोट लग्ने भनेर नगरपालिकाबाट लगेको उपप्रमुख सरस्वती कोलीले जानकारी दिइन्। उनले भनिन्, ‘बाटामा कतै नछाड्ने शर्तमा उनीहरुले गाई लगेका हुन्।’

पानीको मुहानमा मृतावस्थामा गाई भेटिएपछि प्रहरी टोली त्यसतर्फ पठाइएको इलाका प्रहरी कार्यालयका पाटनका प्रहरी निरीक्षक धनदेव साउँदले जानकारी दिए।

गाईको हत्या गरेर फालेको भए कानूनअनुसार कारवाही हुने प्रहरी नायब उपरीक्षक अधिकारीले बताए।

गत वर्ष वीरेन्द्रनगरमा दुई दर्जन गाई मृत भेटिएका छन्। नेपालगञ्जको कान्जीहाउसबाट ल्याइएका २९१ गाईमध्ये वीरेन्द्रनगरको कटकुवा जंगलमा २३ गाई मृत भेटिएका थिए।

त्यस्तै ०७४ कात्तिकमा पनि कपिलवस्तुमा नौ वटा गाई मृत अवस्थामा फेला परेका थिए। जिल्लाको वाणगंगा नगरपालिका २ पिपरामा रहस्यमय तरिकाबाट मृत अवस्थामा फेला परेका हुन्।