अग्रज पत्रकार धामी सम्मानित

कञ्चनपुर । कञ्चनपुरमा बसेर करिब तीन दशकदेखि अनवरत पत्रकारिता गर्दै आएका अग्रज पत्रकार माधवसिंह धामी सम्मानित भएका छन्।

भिमदत्त नगरपालिकाले आफ्नो ४३ औं वार्षिकोत्सबका अवसरमा अग्रज पत्रकार धामीलाई सम्मान गरेको हो।

जिल्लामा पत्रकारिता र पत्रकारितामा आदर्शको जग बसाउन उल्लेखनीय भूमिका निर्वाह गरेकामा धामीलाई नगरपालिकाले सम्मान गरेको बताइएको छ।

धामी सुदूरपश्चिममा बसेर लामो समय निष्ठा, इमान, आचारसंहिता र पत्रकारिताको मर्यादा जोगाउने गरि पत्रकारिता गर्दै आएका व्यक्तिमा गनिन्छन्। उनले यस क्षेत्रमा बसेर पत्रकारिताको वृद्धि विकास मात्र होइन मुलुकमा प्रजातन्त्र स्थापनाका लागि ठूलो योगदान गरेका छन्।

नेपाल प्रेस युनियनको संस्थापनकालदेखि सक्रिय अग्रज पत्रकार धामी सम्मानित भएकोमा यस क्षेत्रले नै गर्व अनुभव गरेको कञ्चनपरमा बसेर पत्रकारिता गर्दै आएका दिपेन्द्र बस्न्यातले बताए।