विद्यालयमा ‘जङ्क फुड’ निषेध, सरकारले तोक्यो ‘मेनु’

काठमडौं । सरकारले देशभरका सबै सामुदायिक विद्यालयमा ‘जङ्क फुड’ खुवाउन निषेध गरेको छ।

शिक्षा तथा मानव स्रोत विकास केन्द्र सानोठिमीले प्रकाशन गरी सोमबार सार्वजनिक गरेको ‘विद्यालय दिवाखाजा व्यवस्थापन सहयोगी पुस्तिका’ मा सामुदायिक विद्यालयका प्रारम्भिक बालविकासदेखि कक्षा ५ सम्मका विद्यार्थीलाई दिवाखाजामा ‘जङ्क फुड’ खुवाउन निषेध गरिएको छ।

यसले जंक फुडको व्यापार गर्नेलाई ठूलो धक्का पुग्ने छ। विद्यालयमा नै जंक फुड निशेष गर्नुको अर्थ यी खाने कुरा स्वास्थ्यका लागि निकै हानिकारक छन् भन्ने सन्देश पनि भएकाले आम जीवनमा पनि जंक फुडप्रति मानिसको रुची कम हुने जानकारहरु बताउँछन्।

केन्द्रले स्थानीयस्तरमा उत्पादन हुने खानेकुरालाई नै प्राथमिकतामा राख्दै विभिन्न ६० प्रकारका खानेकुराको ‘मेनु’ तयार गरेर पुस्तिका सार्वजनिक गरेको छ।

सरकारले विद्यार्थीलाई दिवाखाजाका लागि सात अर्ब ७२ करोड ९३ लाख ३० हजार विद्यालयमा पठाइसकेको कार्यक्रममा जानकारी दिएको छ। सोअन्तर्गत देशभरिका २९ लाख ४० हजार ७८९ विद्यार्थीलाई विद्यालयमा दैनिक खाजा निःशुल्क उपलब्ध गराइने छ। सरकारले कर्णालीमा प्रतिविद्यार्थीलाई दैनिक २० र अन्य क्षेत्रमा विद्यार्थीलाई १५ का दरले दिवाखाजाको रकम उपलब्ध गराउने भएको छ।