चैतभित्रमा युवा संघले पाँच लाख सदस्यता बाँड्ने, हरेक कमिटीमा साइबर सेना गठन गरिने

काठमाडौं। नेकपा ओली निकट राष्ट्रिय युवा संघले चैत मसान्तभित्र पाँच लाख सदस्यता विस्तार गर्ने जनाएको छ।

गत माघ २५ र २६ गते भएको दोस्रो केन्द्रीय कमिटी बैठकले गरेका निर्णय शनिबार सार्वजनिक गर्दै पत्रकार सम्मेलनमा संघका नवनिर्वाचित अध्यक्ष बचनबहादुर सिंहले ‘जहाँ युवा त्यहाँ राष्ट्रिय युवा संघ’ भन्ने मान्यता अनुरूप चैत मसान्तभित्र पाँच लाख सदस्य विस्तार गर्ने बताए।

उनले चैतमसान्तभित्र ७७ वटा जिल्ला कमिटी, १६५ वटा सघीय निर्वाचन क्षेत्र समन्वय कमिटी, ३३० प्रदेश निर्वाचन क्षेत्र समन्वय कमिटी, ७५३ स्थानीय तह कमिटी र ६ हजार ७४३ वडा कमिटी गठन गर्ने समेत जानकारी दिए।

साइबर सेना पनि बनाइने

सिंहले सबै कमिटीमा साइबर सेना समेत गठन गर्ने जानकारी दिए। मुलुकको स्वाधीनता तथा जनआन्दोलनबाट प्राप्त उपलब्धिको रक्षा गर्न सबै कमिटीमा साइबर सेना बनाउन थालिएको बताए।

यसअघि तत्कालीन नेकपा (एमाले)को युवा संघले युथ फोर्स गठन गरेको थियो। बैठकले सरकारले गरेको लोकप्रिय काम र असाधारण उपलब्धिलाई जनताबीचमा पुर्‍याउन संघका नेता कार्यकतालाई विशेष अभियानका साथ परिचालन गर्ने निर्णय गरेको छ।

बैठकले विदेशबाट स्वदेश फर्किएका र स्वदेशमा रहेका युवा जनशक्ति राज्यको नीति तथा कार्यक्रममा पूर्णरूपमा जोडिन नसकेको भन्दै संविधानमा उल्लेख गरिएको युवा हक अधिकार र सरकारद्वारा घोषित युवामैत्री नीति कार्यक्रमलाई पूर्णतः युवाले सदुपयोग गर्न वातावरण मिलाउन सरकारसँग माग गरेको छ।

बैठकले सरकारले आगामी वैशाख १७ र २७ गते घोषणा गरिएको प्रतिनिधिसभा निर्वाचनमा क्रियाशील हुन सबै कमिटीलाई निर्देशन दिएको अध्यक्ष सिंहले बताए।