भाडा समायोजन भए पनि ट्याक्सी व्यवसायी सधैँ असन्तुष्ट

काठमाडौं । पटक–पटक भाडा समायोजन भए पनि ट्याक्सी व्यवसायीले भने वैज्ञानिक भाडादर समायोजन नभएको भन्दै विरोध गर्दै आएका छन् । सरकारले पहिलोपटक २०६५ सालमा वैज्ञानिक भाडादर लागू गरेको थियो । २०६९ सालमा यसैअनुसार पुनः भाडादर समायोजन गरियो । २०६९ सालपछि पनि सार्वजनिक सवारीको दुईपटक भाडा समायोजन भएको छ तर ट्याक्सी व्यवसायीले भने विगत दुई महिनादेखि वैज्ञानिक भाडादर समायोजनको माग राखी आ–आफ्ना ट्याक्सीे पछाडि प्लेकार्ड टाँसिरहेका छन् ।

यातायात व्यवस्था विभागले भने पटक–पटक भाडा समायोजन गरिएको तर ट्याक्सी व्यवसायीहरूले सरकारलाई ‘ब्ल्याक मेलिङ’ गरिरहेको जनाएको छ । ट्याक्सी पछाडि टाँसिएका प्लेकार्ड ट्राफिक प्रहरीले च्यात्ने काम गरे पनि व्यवसायीले भने राख्न छाडेका छैनन् ।

विभागका अनुसार पछिल्लो भाडा समायोजन गत पुस महिनामा गरिएको थियो । गत असोज ७ गते सार्वजनिक यातायातमा भाडा वृद्धि गरेपछि ट्याक्सीमा पनि दस प्रतिशत वृद्धि भएको हो । नेपाल गुणस्तर तथा नापतौल विभागले ट्याक्सीका मिटर र प्रिन्टर मेसिनको चेकजाँच गरी नयाँ मूल्य समायोजन भएको थियो । आजको गाेरखापत्र दैनिकमा खबर छ ।