कांग्रेस नेतृत्वले सादगी जीवनलाई ग्रहण गर्नुपर्छ

भक्तपुर । पार्टीका नेताको विचार, स्वभाव र चरित्रले नेपाली काङ्ग्रेस बलियो हुने पार्टीका शीर्ष नेताले बताएका छन् ।

नेपाली काँग्रेस भक्तपुरका स्व नेता जानकीप्रसाद कुँइकेलको स्मृतिसभामा नेताहरुले असल विचार दिने र चरित्र बचाउने जो कोही व्यक्ति कालन्तरसम्म स्मरणीय रहने धारणा व्यक्त गरे ।

नेपाली काँग्रेसका वरिष्ठ नेता गोपालमान श्रेष्ठले स्व कुँइकेलको सादगी जीवनको काँग्रेसका शुभचिन्तक, कार्यकर्ता एवं माथिल्लो नेतृत्वले सदैव ग्रहण गर्नुपर्छ भने ।

उनले काँग्रेसका सादगी नेता र निष्ठावान कार्यकर्ताको अथक प्रयासले नेपालमा राणा शासन, पञ्चायत व्यवस्था र राजतन्त्रको अन्त्य भएको दाबी गरे ।

प्रजातन्त्र पुनःस्थापनाका लागि स्व कँुइकेलले भूमिसुधार कार्यालयको जागिर छोडेर राजनीतिमा लागेका थिए । त्यसबेला उनी खरिदार थिए । जतिबेला त्यो पद र कार्यालयलाई सुनको फूलपार्ने कुखुरा मानिन्थ्यो ।

पद र पैसाका लागि इमान बेच्न हुन्न भन्ने मान्यता राख्दै हरेक आन्दोलनमा निस्वार्थपूर्वक सक्रिय हुँदै उनले पटक–पटक जेल जीवन विताउनुपरेको थियो ।

उनका सहपाठी तथा काङ्ग्रेसका वरिष्ठ नेता माथवरसिंह बस्नेतले स्व कँुइकेल निष्ठाको प्रयावाची भएको धारण व्यक्त गरे ।

नेपाली काङ्ग्रेस भक्तपुरका सभापति दुर्लव थापाले माथवरसिंह बस्नेत, जानकीप्रसाद कँुइकेल, ईश्वर घिमिरेलगायतका नेतालाई पञ्चायती सरकारले राजकाज मुद्दा लगाएर आजीवन जेल सजाय तोकिएको भन्दै २०३७ सालको जनमतसङ्ग्रह अगाडि भएको आम माफिमा उनीहरु जेलबाट छुटेको बताए ।

काङ्ग्रेसका नेता शिवबहादुर खडकाले नेपालका हरेक आन्दोलनमा नेपाली काङ्ग्रेसले अग्रणी भूमिका निर्वाह गरेको उल्लेख गर्दै काङ्ग्रेसभित्र देखिएका चरम गुटबन्दीलाई हटाउनुपर्ने बताए ।