सशस्त्र प्रहरीले प्रयोग गरेको खेलमैदान खाली गराइँदै

कुश्मा । पर्वत सदरमुकाम कुश्मा नगरपालिका–५ बडागाउँस्थित सशस्त्र प्रहरीले प्रयोग गर्दैै आइरहेको पुरानो खेलमैदान फिर्ता गर्न पहल शुरु गरिएको छ ।

बडागाउँ चौर २०५८ सालदेखि सशस्त्र प्रहरी बलको चण्डिका गणले प्रयोग गर्दै आएको छ । तत्कालीन सशस्त्र द्वन्द्वको समयमा सशस्त्र प्रहरीले सो चौर प्रयोग गरेको हो । विभिन्न खेल प्रतियोगिता हुने मैदानलाई पुनः प्रयोगमा ल्याई सशस्त्र प्रहरीलाई अन्यत्र स्थानन्तरण गर्न स्थानीयवासीले माग गर्दै आएका छन् ।

स्थानीयवासीका अनुसार ८३ रोपनी जग्गा जिल्ला खेलकूद विकास समितिको नाममा छ । हाल त्यहाँ तैनाथ चण्डिका गणले धौलागिरिका चार जिल्ला हेर्दै आएको छ । सो मैदानबारे कुश्माका बासिन्दाले पटक–पटक सम्बन्धित विभाग, मन्त्रालय र प्रधानमन्त्री कार्यालयसम्म लिखित र मौखिक जानकारी गराइसकेका छन् । अहिले त्यसबारे छलफल भइरहेको जिल्ला समन्वय समितिका संयोजक मनोहर पौडेलले बताए ।

“सदरमुकाममा खेलमैदानको अभाव छ, शसस्त्र प्रहरीले मैदान ओगट्दा खेलकूद गतिविधि शून्य भएको छ,” उनले भने । विसं २०५८ अघिसम्म जिल्लामा आयोजना गरिने खेल गतिविधि र सार्वजनिक कार्यक्रम सो मैदानमा गरिँदै आएको थियो । अहिले सार्वजनिक कार्यक्रम गर्न खुला चौरको अभाव छ ।