भारतीय लोकसभा निर्वाचनः भाजपालाई अत्यधिक बहुमत, नतिजा आजै सार्वजनिक हुने, मोदी फेरि प्रधानमन्त्री बन्ने पक्का

नयाँदिल्ली । भारतको लोकसभाका लागि भएको निर्वाचनको बिहीबार साँझसम्मको मत गणना अनुसार भारतीय जनता पार्टीलाई अत्यधिक बहुमत आउने प्रष्ट सङ्केत देखिएको छ ।

बिहीबार बिहानदेखि मतगणना अनुसार सत्तारूढ भारतीय जनता पार्टीले १५ सीटमा बिजय हाँसिल गरिसकेको छ । भाजपाले अन्य ३५१ स्थानमा अग्रता कायम गरेको भारतीय निर्वाचन आयोगले जनाएको छ । प्रमुख प्रतिपक्षी भारतीय कङ्ग्रेसले दुई स्थानमा बिजय हासिल गरेको छ भने ९० स्थानमा अग्रता कायम गरेको छ ।

भाजपा गठबन्धन नेशनल डेमोक्रेटिक अलाएन्स (एनडीए) ले ३५१ स्थानमा अग्रता कायम गरेको छ भने कङ्ग्रेस आई निकट यूनाइटेड प्रोग्रेसिभ अलाएन्स (यूपीए) को ९४ स्थानमा अग्रता कायम रहेको छ । अन्य १०२ स्थानमा अन्य साना तथा क्षेत्रीय दलको अग्रता रहेको छ ।

भाजपाले बहुमत आउनेभएपछि प्रधानमन्त्री नरेन्द्र मोदीलाई आगामी प्रधानमन्त्रीका रूपमा हेरिएको छ । उनको गठबन्धनले अत्यधिक बहुमत स्थानमा अग्रता कायम गरेपछि उनलाई नेपालका प्रधानमन्त्री के पी शर्मा ओली, पाकिस्तानी प्रधानमन्त्री इमरान खान, इजरायली प्रधानमन्त्री बेन्जामिन नेतन्याहु लगायतले बधाई शन्देस पठाएको भारतीय सञ्चारमाध्यमले प्रशारण गरेका छन् ।

भारतीय प्रधानमन्त्री नरेन्द्र मोदीले आफू, आफ्नो दल र आफू नेतृत्वको गठबन्धनलाई मतदान गरी विजयी गराउने भारतीय समर्थक, शुभचिन्तक, कार्यकर्ता तथा जीतका लागि अनवरत लाग्ने नेतृत्वलाई वधाई दिएका छन् । उनले विजेपीको मुख्यालयमा सम्बोधन गर्दै धन्यवाद ज्ञापन गरेका हुन् ।

उनले निर्वाचनका लागि तय गरेको नारा सबको साथ, सबको विकास, सबको विश्वासको निष्कर्ष समग्र भारत र भारतीयहरूको विजय भन्ने वाक्यांश दोहोराउँदै भाजपाले आगामी दिनमा सवैलाई विश्वासमा लिएर अघि बढ्ने बताएका छन् ।

कङ्ग्रेस नेता राहुल गान्धीले भारती प्रधानमन्त्री नरेन्द्र मोदीलाई निर्वाचनमा पाएको सफलताका लागि बधाई दिएका छन् । निर्वाचन परिणाम कङ्ग्रेसका लागि अनपेक्षित रहेको भएपनि कङ्ग्रेसका शुभचिन्तकलाई नआत्तिन राहुल गान्धीले एक पत्रकार सम्मेलनमार्फत् आग्रह गरेका छन् । उनले यस पहिल सन् २०१४ मा करिब एक लाख मतका साथ विजय हाँसिल गरेको अमेठी निर्वाचन क्षेत्रमा आफ्नो हार स्वीकार गरेका छन् ।

पाँच सय ४५ सदस्यीय भारतीय लोकसभामा ५४३ स्थानका लागि चुनाव भएको थियो । दुई स्थान राष्ट्रपतिले चयन गर्ने भारतीय संवैधानिक प्रावधान छ । लोकसभाका साथै उडिसा, आन्ध्र प्रदेश, सिक्किम र अरुणाचल प्रदेशको विधानसभाका लागि पनि चुनाव भएको थियो । अप्रिल ११ मा शुरू भएको निर्वाचन विभिन्न सात चरणमा गरी मे १९ मा सम्पन्न भएको थियो । चुनावको नतिजा आजै सार्वजनिक गर्नेगरी भारतीय निर्वाचन आयोगले तयारी गरेको छ ।