महाकाली सिँचाइ : ठेक्का भएको डेढ वर्षपछि मुआब्जा वितरण शुरु

शेरबहादुर सिंह

कञ्चनपुरमा महाकाली सिँचाइ तेस्रो चरणअन्तर्गत मूल नहरमा पर्ने जग्गाको मुआब्जा वितरण थालिएको छ । निर्माणका लागि ठेक्का सम्झौता भएको करीब आधा समय (डेढ वर्ष)पछि यहाँको शुक्लाफाँटा र वेदकोट नगरपालिकाअन्तर्गत मूल नहरमा पर्ने जग्गाको मुआब्जा वितरण थालिएको हो ।

दुई वर्षमा भीमदत्तनगरपालिकाको ब्रह्मदेव क्षेत्रमा करीब १३ किलोमिटर मूल नहर बनिसकेपछि डेढ वर्षअघि थप १५ किलोमिटर नहर निर्माणका लागि तीन प्याकेजमा सम्झौता भएको थियो । महाकाली सिँचाइ तेस्रो चरण आयोजनाका निर्देशक लोकबहादुर थापाले हाल पुर्जावाला जग्गाधनीको मुआब्जा वितरण भइरहेको जानकारी दिए ।

उनले हालसम्म चार करोड रकम मुआब्जामा वितरण भइसकेको जानकारी दिँदै जग्गाको वर्गीकरणअनुसार पाँच लाख प्रतिकठ्ठादेखि नौ लाखसम्मको दरले वितरण भइरहेको बताए । ‘चालू आवमा मुआब्जाका लागि १० करोड रकम आएको थियो’, निर्देशक थापाले भने, ‘चालू आवको असारभित्र रकम नलगे ‘फ्रिज’ हुने सम्भावना रहन्छ ।’

उनले मुआब्जा लैजान ढिलो नगर्न जग्गाधनीलाई आग्रहसमेत गरे । ‘कतिपय जग्गाधनीले मुआब्जा लैजान ढिलो गरिरहेका छन्’, उनले भने, ‘अहिलेको बजेट फ्रिज भए अर्को बजेटमा त्यसको व्यवस्था हुनसकेको छैन ।’

त्यसैगरी नयाँ आर्थिक वर्षको बजेटमा महाकाली सिँचाइका लागि आवश्यक बजेट विनियोजन नभएको थापाको भनाइ छ । ुराष्ट्रिय गौरवको आयोजना भए पनि रकम पर्याप्त भएनु, थापाले भने, ‘चाहिएजति बजेट विनियोजन नहुँदा काम सुस्तगतिमा छ ।’ उनले सङ्घीय सरकारले सिँचाइका लागि ५० करोड रकम विनियोजन गरेको जानकारी प्राप्त भएको बताए ।

तीन मूल नहर निर्माणको प्याजेकको समयावधि तीन वर्ष तोकिए पनि सिँचाइ कार्यालयले समयमा मुआब्जा टुङ्ग्याउन नसक्दा कार्यावधि बढ्ने निर्माण पक्षको भनाइ छ । ‘मुआब्जाको विषय टुङ्ग्याउने जिम्मेवारी सिँचाइ कार्यालयको हो’, निर्माण कम्पनीका एक कर्मचारीले भने, ‘मुआब्जा नटुङ्गिँदा नहर खन्न पाउने अवस्था थिएन ।’