चितवन। वैशाख १० गतेको उपनिर्वाचनमा चुनावी माहोल आफ्नो पक्षमा पार्न प्रधानमन्त्री पुष्पकमल दाहालसहित तीन पूर्वप्रधानमन्त्री आज चितवनको चुनावी सभामा सहभागी हुने भएका छन्।
लोकतान्त्रिक बाम गठबन्धनले आयोजना गरेको पूर्वी चितवनको कालिका नगरपालिकामा हुने चुनावी सभालाई सम्बोधन गर्न उनीहरु आज चितवन ओर्लिने भएका हुन्।
उपनिर्वाचनमा चितवन २ मा गठबन्धनका तर्फबाट नेपाली कांग्रेसका जितनारायण श्रेष्ठ उम्मेदवार छन्। उनैको पक्षमा चुनावी माहोल बनाउन प्रधानमन्त्रीसहित तीन उपप्रधानमन्त्रीसहितका शीर्ष नेता चितवनको चुनावीसभालाई सम्बोधन गर्न लागेका हुन।
दिउँसो कालिका नगरपालिका ४ को पदमपुरमा रहेको एक खेलकुद मैदानमा चुनावी सभाको आयोजना गरिएको कांग्रेस चितवनका सचिव सूर्य अर्यालले जानकारी दिए।
सोही सभामा प्रधानमन्त्री तथा माओवादी केन्द्रका अध्यक्ष पुष्पकमल दाहाल, नेपाली कांग्रेसका सभापति पूर्वप्रधानमन्त्री देशरबहादुर देउवा, एकीकृत सभाजवादीका अध्यक्ष तथा पूर्वप्रधानमन्त्री माधवकुमार नेपाल, जनता समाजवादीका अध्यक्ष एवं पूर्वप्रधानमन्त्री बाबुराम भट्टराईलगायतका शीर्ष नेताले सम्बोधन गर्ने कार्यक्रम छ।
चुनावी शभामा कांग्रेसका महामन्त्री विश्वप्रकाश शर्मा, नेता शेखर कोइरालालगायतका शीर्ष नेताले सम्बोधन गर्नेछन्।
