कैलाली ५ असार। बझाङमा भएको जिप दुर्घटनामा सुदूरपश्चिम प्रदेशका आन्तरिक मामिलामन्त्री पृथ्वीबहादुर सिंहकी पत्नी र भाउजूको मृत्यु भएको छ।
मृत्यु हुनेमा मन्त्री सिंहकी पत्नी अमृता सिंह र उनकी भाउजू जयादेवी सिंह रहेको जिल्ला प्रहरी कार्यालय बझाङका सूचना अधिकारी प्रहरी निरीक्षक दिवेश चौधरीले जानकारी दिए।
दुर्घटनामा गम्भीर घाइते भएका मन्त्री सिंहसहित तीन जनालाई थप उपचारका लागि हेलिकप्टरमार्फत नेपालगन्ज पठाइएको छ।
घाइते मन्त्री सिंह, उनका सुरक्षा गार्ड सहायक प्रहरी हवल्दार दीपक भण्डारी र गाडी चालक घर्मराज जोशीलाई थप उपचारका लागि नेपालगन्ज पठाइएको चौधरीले बताए।
मन्त्री सिंह चढेको गाडी डडेलधुराबाट चैनपुर जाने क्रममा आज दिउँसो दुई बजेतिर केदारस्युँ गाउँपालिकाको धारछडा भन्ने ठाउँमा सडकबाट करिब ५० मिटर तल कालंगा खोला किनारमा खसेको थियो।
