काठमाडौं । निर्वाचन आयोगले नागरिक उन्मुक्ति पार्टी (नाउपा) का अध्यक्षमा रञ्जिता श्रेष्ठलाई यथावत राख्ने निर्णय गरेको छ।
आयोगको हिजो सम्पन्न बैठकले पार्टी नेतृत्वमा हेरफेर गरिएको भनी प्राप्त विवरण प्रक्रियासम्मत नभएको निष्कर्ष निकालेको हो। यससंगै आयोगले पुरानै अभिलेखलाई निरन्तरता दिने निर्णय गरेको निर्वाचन आयोग स्रोतले जनाएको छ।
स्रोतका अनुसार, नाउपाबाट अध्यक्षको हेरफेर भएको भनी अभिलेख अद्यावधिक गरिदिन पत्र आएको थियो। तर, आवश्यक प्रक्रिया पूरा नगरेकाले परिवर्तन मान्य नभएको आयोगको निष्कर्ष छ।
यसअघि, नाउपाका अध्यक्ष श्रेष्ठ पटक–पटक विवादमा परेपछि साउन १४ र १५ गते काठमाडौंमा भएको राष्ट्रिय भेलाले उनलाई पदबाट बर्खास्त गर्दै लालवीर चौधरीलाई नयाँ अध्यक्ष तोकेको थियो। सो निर्णयसहित आयोगलाई अद्यावधिकका लागि पत्र पठाइएको थियो।
तर आयोगको निर्णयपछि रञ्जिता श्रेष्ठ नै नाउपाको आधिकारिक अध्यक्ष रहने भएका छन्।
नागरिक उन्मुक्ति पार्टी निर्वाचन आयोग रञ्जिता श्रेष्ठ
