काठमाडौं । नेपाल आर्थिक पत्रकार संघ (सेजन) को २७ औं बार्षिक साधारण सभासँगै चुनावी सरगर्मी समेत बढेको छ ।
भदौ २१ गते शनिबार काठमाडौंमा हुने साधारण सभाले नयाँ कार्यसमिति समेत चयन गर्ने भएकाले यसप्रति सरोकारवालाको विशेष चासो बढेको छ ।
साधारण सभा तथा निर्वाचन प्रयोजनका लागि सदस्यता नविकरणको काम समेत यतिबेलै धमाधम चलिरहेको छ । भदौ १८ गते कार्यालय समयभित्र आफ्नो सदस्यता नविकरण गराउन सेजनले सदस्यहरुलाई आव्हान गरिसेकको छ ।
भदौ १८ गते भित्र नविकरण भएका सदस्यहरुले मात्रै साधारण सभा तथा निर्वाचनमा भाग लिन पाउने सेजनले जनाएको छ ।
निर्वाचनको मिति नजिकिँदै गर्दा उम्मेदवारहरु सदस्य भेटघाटमा व्यस्त छन् ।
यस पटक अध्यक्ष पदका लागि ३ जना मैदानमा उत्रिएका छन् । उम्मेदवारी घोषणा गर्नेमा भागवत भट्टराई, विश्वास रेग्मी र आशा थपलिया छन् ।
भट्टराई निवर्तमान महासचिव हुन् भने रेग्मी वर्तमान महासचिव । थपलिया नारायण सापकोटा अध्यक्ष हुँदा कोषाध्यक्षको जिम्मेवारीमा थिए । भट्टराई सेतोपाटी, रेग्मी गोरखापत्र र थपलिया नेपाल टेलिभिजनमा आवद्ध छन् ।
त्यस्तै उपाध्यक्षमा जीवन कुमार बस्नेतले मात्रै उम्मेदवारी घोषणा गरेका छन् । बस्नेत कारोबार दैनिकमा आवद्ध छन् ।
महासचिवमा अच्युत पुरी र कमल कुमार बस्नेतले उम्मेदवारी घोषणा गरेका छन् । पुरी वर्तमान समितिका कोषाध्यक्ष हुन् । पुरी अनलाईन खबर र बस्नेत राष्ट्रिय समाचार समितिमा आवद्ध छन् ।
त्यस्तै सचिव पदमा शंकर पण्डितले मात्रै उम्मेदवारी घोषणा गरेका छन् ।
कोषाध्यक्षमा केशु लामिछाने र ममता थापाले उम्मेदवारी घोषणा गरेका छन् । लामिछाने र थापा वर्तमान समितिका सदस्य हुन् ।
त्यसैगरी सदस्यहरुमा पाँच जनाले उम्मेदवारी घोषणा गरेका छन् । यसरी उम्मेदवारी घोषणा गर्नेमा राजु बास्कोटा, भोजराज भण्डारी, सीमा तामाङ, भरत रावल र कमल धिताल छन् ।
