काठमाडौं। राष्ट्रिय स्वतन्त्र पार्टी (रास्वपा) का सभापति तथा प्रतिनिधिसभा सदस्य रवि लामिछानेले आफूहरु सिंहदरबार चलाउन नभै बदल्न आएको बताएका छन्।
उनले फागुन २१ को निर्वाचनपछि बिहीबार बसेको नयाँ प्रतिनिधिसभाको पहिलो बैठकलाई सम्बोधन गर्दै जनताले दिएको मतादेशप्रति प्रतिबद्धता व्यक्त गर्दै त्यसको सम्मान कामबाटै गर्ने बताए।
उनले भने, ‘जनताले करिब दुई तिहाइको मताधिकारसहित आदेश दिएका छन्। जनतालाई प्रतिज्ञा गर्छु कि यो मतादेशको गुण हामी जिम्मेवारी पूरा गरेर तिर्नेछौं। यो मतादेशमा जनताको आशा पनि छ, आक्रोश पनि छ। पाएको मत समर्थनको मात्र होइन, परिवर्तनको मत हो।’
उनले आफूहरुले पाएको जनताको म्यान्डेट सिंहदरबार चलाउन नभएर, बदल्नका लागि दिएको बताए।
‘म गर्वका साथ भन्न सक्छु, हामीले बदल्न सुरु गरिसकेका छौं,’ उनले भने, ‘केवल भाषणले मात्र परिवर्तन सम्भव हुँदैन, कामबाट प्रमाणित गर्नुपर्नेछ। हामीले बोलेर मात्रै पुग्दैन। मैले मात्र होइन, रास्वपाका हरेक माननीयले कामबाटै आफूलाई, पार्टीलाई र सरकारलाई प्रमाणित गर्नुपर्छ’, उनले भने, ‘अब हामी राम्राे बोल्नुभन्दा पनि कामहरू, सरकारका कामहरू आफैं बोल्नेछन्। ती बोल्न सुरु गरिसकेको कुरा म जानकारी गराउन चाहन्छु।’
उनले सरकारलाई ‘हनिमुन पिरियड’ आवश्यक नरहेको उल्लेख गर्दै छिटो काम गर्ने प्रतिबद्धता व्यक्त गरे।
‘हामीलाई हनिमुन पिरियडको सुविधा पनि चाहिँदैन। हामी दिन गनेर होइन, सेकेन्ड गनेर काम गर्न चाहन्छौं, त्यो सुरु गरिसकेका छौं,’ उनले भने।
लामिछानेले विपक्षी दलका प्रतिबद्धतासमेत कार्यान्वयन गर्न तयार रहेको स्पष्ट पार्दै विगतका सरकारबाट सिक्ने प्रतिबद्धता जनाए।
उनले भने, ‘हामी आफ्ना मात्र होइन, विपक्षी दलका चुनावी प्रतिबद्धता पनि स्वामित्व लिन तयार भएर आएका छौं। यसअघि पनि पटक–पटक एकल बहुमतका सरकार नबनेका भने होइनन्। तर ती सरकारहरू इतिहासका अंग बने, इतिहास बदल्ने औजार बन्न सकेनन्। हामी इतिहासबाट सिक्न लाज मान्ने छैनौं।’
उनले जनताले दिएको बहुमतलाई गुमेको अवसरका रूपमा इतिहासमा लेखिन नदिने प्रतिबद्धता पनि व्यक्त गरे।
‘जनताले हामीलाई दिएको विशाल बहुमतको इतिहास फेरि ‘गुमेको अवसर’ भनेर लेखियो भने कलंकित हुनेछौं, हामीलाई त्यो मन्जुर छैन,’ रविको भनाइ थियो।
रवि लामिछाने रास्वपा
