काठमाडौं १७ माघ। प्रधानमन्त्री पुष्पकमल दाहालले आफ्नो कार्यकालमा शासनको नेतृत्व सिंहदरबारबाटै गर्ने सोच बनाएको बताए।
मंगलबार प्रधानमन्त्री तथा मन्त्रिपरिषदको कार्यालय सिंहदरबार प्रधानमन्त्री कार्यालय मातहतका निकाय र कार्यालयहरूको बैठकमा प्रधानमन्त्रीले सो कुरा बताए।
बैठकलाई सम्वोधन गर्दै प्रधानमन्त्रीले भने,‘मैले सिंहदरबारलाई कार्यसञ्चालनको मुख्य थलोको रूपमा लिएको छु। विगतमा सिंहदरबार बाहिर वा निवासबाट शासन चलाउने काम भएको तीतो अनुभूति तपाई हामी सबैसँग छ। यसपटक हामीले सो गल्ती दोहोर्याउनु हुँदैन। विशेष परिस्थितिमा बाहेक सिंहदरबारबाटै काम गर्ने सोचेको छु।’
‘‘यसपटक सिंहदरबारबाटै शासनको नेतृत्व गर्ने सोचेको छु, यसको विशेष अर्थ छ’, प्रधानमन्त्रीले भने, ‘प्रधानमन्त्रीले सिंहदरबारबाट काम गर्नु भनेको राज्यका सबै अंगहरूको एकीकृत परिचालनको नेतृत्व गर्नु हो। राज्यका सबै अंगलाई जवाफदेही र उत्तरदायी बनाउनु पनि हो, दण्ड र पुरस्कारको व्यवस्थित प्रणाली स्थापित गर्नु हो।’
उनले मातहतका कर्मचारीलाई आफ्ना कुरा निर्धक्कसाथ राख्न पनि आग्रह गरे। ‘म नयाँ अठोटका साथ काम गर्न आएको छु। सुशासन, सामाजिक न्याय र समृद्धिको आकांक्षा पूरा गर्ने अठोटका साथ आएको छु। सदनमा मलाई प्राप्त विश्वासको मत पनि त्यही जिम्मेवारीका साथ आएको छ। त्यसलाई मैले गम्भीर रूपमा लिएको छु’, उनले भने।
राम्रो काम गर्ने कर्मचारीलाई पुरस्कृत गरिनेछ
सम्वोधनका क्रममा प्रधानमन्त्री दाहालले कर्मचारी संयन्त्रमा दण्ड र पुरस्कारको व्यवस्थालाई प्रभावकारी रूपमा लागू गरिने बताए।
भने, ‘मेरो प्रधानमन्त्रीत्व कालमा कार्यालयअन्तर्गत रहनुभएका कर्मचारीहरूको उर्जा र सम्मानलाई जोड दिनेछु। तपाईँहरूले आफ्नो भूमिका गम्भीरतापूर्वक खेल्नुस्। मैले पनि अभिभावकीय भूमिका खेल्छु। तपाईँहरूले सक्रियतापूर्वक भूमिका खेलेमा राम्रो परिणाम आउँछ। राम्रो काम गर्ने कर्मचारीलाई पुरस्कृत गरिनेछ। तपाईँहरू सबै पुरस्कृत हुन प्रतिस्पर्धा गर्नुस्।’
‘निर्णय प्रक्रियामा सरलीकरण गरी छिटो छरितो कार्यसम्पादन गर्न निर्देशित गर्छुु, प्रधानमन्त्रीले भने, ‘मैले सचिवहरूलाई दिएको निर्देशनमा धेरै कुरा भनिसकेको छु। त्यसलाई तपाईहरूले गम्भीरतापूर्वक लिनुभएको होला भन्ने विश्वास लिएको छु। मन्त्रिपरिषदले पूर्णता पाएको छ। तसर्थ, हिजो बनेको कार्ययोजनामाथि सामूहिक छलफल गर्नुछ। अब मन्त्री र सचिवहरूसमेत राखेर फेरि छलफल गर्नुपर्ने आवश्यकता महसुश भएको छ।’
उनले कर्मचारीहरुले दिएको रिपोर्ट सुनेको र त्यसले सरकारी संयन्त्रको स्थिति बुझ्न राम्रो सहयोग पुगेको पनि बताए। राष्ट्रिय गौरवका आयोजनाको निरन्तर अनुगमन आवश्यक भएको भन्दै सेवा प्रवाहको क्षेत्रमा परिणाम देखिन आवश्यक भएको बताए।
प्रशासनमा सुधार आवश्यक
बैठकमा प्रधानमन्त्री प्रचण्डले देशमा उच्चस्तरीय प्रशासन सुधार आवश्यक भएको धारणा राखे।
‘उच्चस्तरीय प्रशासन सुधार कार्यदल बनाउने कुरामा मेरो ध्यान गएको छ। अनावश्यक कार्यालय हटाउने, दोहोरो कार्यबोझ हटाउने, अनावश्यक कर्मचारी र खर्च घटाएर प्रशासनयन्त्र र सेवा प्रवाहलाई चुस्त बनाउन आवश्यक छ’, उनले भने, ‘साइबर सुरक्षा कसरी गर्ने, एकीकृत डाटा प्रणाली कसरी व्यवस्थित गर्ने, सूचना प्रणालीलाई कसरी एकीकृत र प्रभावकारी बनाउने भन्ने योजनामा सरकार छ।’
उनले सर्भर डाउन भएको घटनाबाट पनि शिक्षा लिन सक्नुपर्ने बताए। त्यसका लागि नीतिगत र व्यवथापकीय क्षेत्रमा सुधार आवश्यक भएको उनको भनाइ थियो।
प्रधानमन्त्रीले देश अहिले पनि अप्ठेरो अवस्थामै भएको भन्दै हामीले गम्भीर रुपमा काम गरेनौँ र परिणाम दिएनौँ भने राष्ट्रको आवश्यकता सम्वोधन गर्न नसकिने बताए।
बैठकमा बोल्दै नेपाल सरकारका मुख्यसचिव शंकरदास बैरागीले प्रधानमन्त्रीको सक्रियताले आफूहरूमा काम गर्ने उर्जा प्राप्त भएको बताए।
उनले भने, ‘हामीले कागजमा उल्लेख गरेका विषयहरू परिणाममा देखिनुपर्छ भन्नेमा तपाईँ हामी सचेत हुनुपर्छ। प्रधानमन्त्रीज्यू यसपटक केही गरेर छोडौँ भन्नेमा हुनुहुन्छ । त्यसले हामीलाई पनि उर्जा दिएको छ।ु
पुष्पकमल दाहाल
