काठमाडौं । नेपाल प्रिमियर लिग (एनपीएल) अन्तर्गत आज बिहान भएको खेलमा कर्णाली याक्सले चितवन राइनोजविरुद्ध रोमाञ्चक जित निकालेको छ ।
यसअघिका दुवै खेलमा जित निकालेको चितवनले आफ्नो तेस्रो खेलमा कर्णालीसँग पराजय व्यहोरेको हो । उता यसअघिका दुवै खेल हारेको कर्णाली तेस्रो खेलमा विजयी भएको हो ।
कर्णालीलाई जितका लागि अन्तिम २ ओभरमा ११ रन आवश्यक थियो । जबकी उसँग ७ विकेट बाँकी थियो । तर, १९औँ ओभर गर्न आएका चितवन राइनोजका सोयल तानबीरले जम्मा २ रन मात्र दिएपछि खेल रोमाञ्चक मोडमा पुगेको थियो ।
अन्तिम ओभरमा कर्णालीलाई जितका लागि अझै ९ रन आवश्यक थियो । अन्तिम ओभर गर्न चितवनका रिजन ढकाल आए । उनले अन्तिम ओभरको पहिलो, दोस्रो र तेस्रो बलमा २-२ रन खर्चिए । अब तीन बल बाँकी हुँदा कर्णालीलाई ३ रनको आवश्यकता थियो ।
फेरि अन्तिम ओभरको चौथो बलमा कर्णालीले रनआउटका रूपमा एक विकेट गुमायो । अब दुई बलमा कर्णालीलाई ३ रन चाहिएको थियो । तर, अन्तिम ओभरको पाँचौँ बलमा जिसन मक्सुदले चौका प्रहार गर्दै टिमलाई रोमाञ्चक जित दिलाए ।
