काठमाडाैं। नेपालको पहिलो कमेडी एक्ट बेस्ड रियालिटी शो ‘सुपर कमेडी लिग’को औपचारिक घोषणा गरिएको छ। ओपन डोर्स इन्टरटेन्मेन्टले निर्माण गर्ने उक्त कार्यक्रमको औपचारिक घोषणा आइतबार आयोजित पत्रकार सम्मेलनमार्फत गरिएको हो।
हास्य-व्यङ्ग्यमा आधारित यस रियालिटी शोमा महानायक राजेश हमालले लिग प्रेसिडेन्टको भूमिका निर्वाह गर्नेछन् भने चर्चित कलाकारहरू विल्सन बिक्रम राई, लुनिभा तुलाधर, रविन्द्र झा र सुरक्षा पन्त क्याप्टेन तथा मेन्टरका रूपमा रहेका छन्।
कार्यक्रमका लागि पाँच शहरमा अडिसन गरिने भएको छ, २०८३ साउन २९ गते दमक स्थित कदम थिएटर, साउन ३१ गते नारायणगढ स्थित राइनो वाटर होटेल, भदौ २ गते नेपालगन्ज स्थित सिद्धार्थ होटल, भदौ ४ गते पोखरा स्थित पोखरा थिएटर र भदौ ६ गते काठमाडौँमा अडिसन सञ्चालन हुनेछ।
अडिसनबाट छनोट हुने ३२ जना प्रतिस्पर्धीलाई चार समूहमा विभाजन गरिने र ८ जनाको उक्त समूहको नेतृत्व ४ जना क्याप्टेनहरुले गर्नेछन्। अडिसनमा सहभागी हुन नपाएका र नेपालबाहिर रहेका नेपाली भाषी इच्छुक प्रतिभाहरूले डिजिटल अडिसन Supercomedyleague@gmail.com अथवा 9802372180 मार्फत आफ्नो भिडियो सामग्री पठाएर पनि सहभागी हुन सक्नेछन्।
सुपर कमेडी लिग मूलतः समूहमा आधारित ढाँचामा प्रतिस्पर्धा हुने कार्यक्रम भएकोले एउटा स्क्रिप्टमा कम्तीमा दुई जना तथा आवश्यकता अनुसार सो भन्दा बढी प्रतिस्पर्धीले संयुक्त रूपमा प्रस्तुति दिनेछन्।
पूर्वनिर्धारित विषय तथा थिममा आधारित प्रस्तुतिहरू मुख्यतः स्केच, स्किट तथा ड्रामेडी लगायतका शैलीमा प्रस्तुति तयार गरिनेछ। कार्यक्रमको उद्देश्य परम्परागत रूपमा कमेडियन खोज्नु मात्र नभई कमेडी एक्टमा प्रस्तुति गर्न सक्ने उत्कृष्ट एक्टरको खोजी गर्नु पनि रहेको आयोजकले जनाएको छ।
प्रतिभाशाली कलाकारलाई राष्ट्रिय तथा अन्तर्राष्ट्रिय स्तरमा आफ्नो क्षमता प्रदर्शनका लागि अवसर प्रदान गर्ने उद्देश्यसहित कार्यक्रम निर्माण गर्न लागिएको निर्देशक एलिन श्रेष्ठले बताए।
नेपाली टेलिभिजन कार्यक्रम निर्माण तथा निर्देशनमा दुई दशक भन्दा लामो समय अनुभव बटुलेका तथा नेपाल आइडल, सारेगम लिल च्याम्प्स, बुगि बुगि, मेरो भोइस युनिभर्स र मेरो डान्स युनिभर्स लगायत विभिन्न अन्तर्राष्ट्रिय फ्रेन्चाइज तथा रियालिटी शोको निर्देशन गरिसकेका एलिन श्रेष्ठले यस कार्यक्रमको निर्देशन गर्नेछन्।
