Logo
१३ माघ २०७९, शुक्रबार

राष्ट्रिय गौरबको महाकाली सिँचाइ : पानी कहिले बग्छ ? ठेगान छैन

अक्षरपाटी
२०७९ मंसीर १६ , शुक्रबार ०९:१२ मा प्रकाशित

कञ्चनपुर १६ मंसिर। राष्ट्रिय गौरवको आयोजनामा समेटिएको महाकाली सिँचाइ आयोजनाको तेस्रो चरण अन्तर्गत बनेको मूलनहरमा पानी परीक्षण गरिए पनि नियमित कहिलेदेखि बग्छ भन्ने विषय टुंगो लागेको छैन।

गत असार १५ मा भारतीय पक्षले मूल नहरमा पानी छाडेको थियो।

सो आयोजनामा तेस्रो चरण अन्तर्गत हालसम्म २६ किलोमिटर मूलनहर बनिसकेको छ।

महाकाली सिँचाइ आयोजना तेस्रो चरणका सिनियर डिभिजनल इञ्जिनीयर शम्भु पण्डितले नहरमा नियमित पानी ल्याउने विषयमा भारतीय पक्षसँग कुराकानी नभएको बताए।

उनले हाल निर्माणाधीन मूलनहरका केही स्थानमा प्राविधिक समस्या देखिएकाले सो विषयमा ध्याना दिइएको जानकारी दिए।

‘गाउजी क्षेत्रको दोस्रो प्याकेजमा पर्ने जंगलक्षेत्रमा प्राविधिक समस्या हुँदा नहरमा नियमित पानी ल्याउने विषयमा कुरा भएको छैन’, उनले भने, ‘पानी ल्याएर कहाँ हाल्ने भन्ने विषयको पनि टुंगो छैन।’

०६४ देखि सुरु भएको आयोजना ०७५ मा आइपुग्दा १२ किलोमिटर मूलनहर निर्माण भएको थियो। पछिल्लो समय आयोजनाले गति लिएको इञ्जिनियर पण्डितको भनाइ छ।

०७५ अघिसम्म मुआब्जा विवाद, बजेट अभाव लगायतका समस्याले जेलिएको बताउँदै उनले भने, ‘अब समस्या नभएकाले आयोजनाले गति लिएको हो।’

एक सय ५१ किलोमिटर मूलनहर निर्माण गरी कैलालीको मालाखेतीसम्म ३३ हजार पाँच सय हेक्टर क्षेत्रफल सिँचाइ सुविधा पु¥याउने लक्ष्य लिएको आयोजनाले अहिले २८ किलोमिटरदेखि ४८ किलोमिटरसम्मको २० किलोमिटर मूलनहर निर्माणको प्रक्रिया अघि बढाइरहेको छ।

‘मूल नहर निर्माणको स्टिमेट बनाएर स्वीकृतिका लागि सिँचाइ विभागमा पेस गरेका छौँं’, उनले भने, ‘स्वीकृति आउनासाथ अरु प्रक्रिया अघि बढ्छ।’

हाल तीन चरणमा निर्माण भइरहेको मूलनहरको पहिलो चरणमा साढे पाँच किलोमिटर मूलनहरको काम सकिएको छ, भने दोस्रो चरणमा पाँच किलोमिटरको पनि ९० प्रतिशत सकिएको आयोजनाले जनाएको छ।

त्यसैगरी तेस्रो चरणमा पाँच किलोमिटरको ७५ प्रतिशत काम सकिएको र बाँकी निर्माण भइरहेको छ।

आयोजना अघि बढाउनका लागि हाल एक अर्ब २४ करोड रकम विनियोजित छ। त्यसैगरी शून्यदेखि २८ किलोमिटरसम्मको मूल नहर अन्तर्गत शाखा नहर निर्माणका लागि दुई प्याकेजमा ठेक्का सम्झौता भइसकेको आयोजनाका इञ्जिनियर पण्डितले जानकारी दिए।

‘४८ किलोमिटर शाखा नहर बनाउन ठेक्का भइसकेको छ’, उनले भने, ‘त्यसका लागि एक अर्ब बढीको ठेक्का सम्झौता भइसकेको छ।’

महाकाली सिँचाइ