काठमाडौं । सुदूरपश्चिम रोयल्सले अस्ट्रेलियाका पूर्व क्रिकेटर ब्राड हजलाई आफ्नो प्रमुख मेन्टरको रुपमा नियुक्त गरेको छ।
सन् २००७ मा अस्ट्रेलियाको विश्वकप विजेता टोलीका सदस्य रहेका हजको आगमनले सुदूरपश्चिम रोयल्सलाई आगामी नेपाल प्रिमियर लिग (एनपिएल) मा उच्च प्रदर्शन गर्न प्रेरित गर्ने अपेक्षा गरिएको छ।
हजले कोलकाता नाइट राइडर्सबाट इन्डियन प्रिमियर लिग (आईपिएल) समेत खेलेका थिए। सुदूरपश्चिम रोयल्सका मालिक स्वतन्त्र प्रताप शाहले हजको आगमनले टोलीलाई थप उत्साहित बनाएको बताउनुभएको छ।
यसैगरी, टोलीमा मार्की खेलाडीका रुपमा दीपेन्द्र सिंह ऐरी रहेका छन् भने मुख्य प्रशिक्षकको भूमिकामा जगत टमाटा छन्। सुदूरपश्चिम रोयल्सको ब्रान्ड एम्बेसडरमा ओलम्पियन दीपक विष्ट र सोसियल एक्टिभिस्ट एम्बेसडरमा केपी खनाललाई नियुक्त गरिएको छ।
नेपाल क्रिकेट संघ (क्यान) को आयोजनामा मंसिर १६ गतेबाट सुरु हुने नेपाल प्रिमियर लिगका लागि टोलीले व्यापक तयारी गरिरहेको छ।
