काठमाडौं । भारतमा वैशाख ३० गते नै मनसुन भित्रिइसकेको छ। भारतको अण्डमान तथा निकोबार द्विप समूहमा सरदरभन्दा ९ दिन अगाडि नै मनसुन प्रविष्ट भएको छ। त्यहाँ अहिले मनसुन विस्तारित हुने उपक्रममा छ।
भारतीय मौसम विभागका अनुसार अण्डमान निकोबार द्विपबाट प्रवेश भएको मनसुन अहिले श्रीलंकाको मध्यक्षेत्रसम्म विस्तार भइसकेको छ।
श्रीलंकामा सरदर २६ मेमा भित्रने मनसुन १७ मेमै प्रवेश भइसकेको छ।
नेपालको मौसम प्रणालीमा पश्चिमी वायु सक्रिय छ। यसका अतिरिक्त स्थानीय वायुको पनि प्रभाव देखिएको छ। पछिल्लो समय बंगालको खाडी र अरब सागरतिरबाट जलवाष्पयुक्त हावा आइरहेकाले नियमित वर्षा भइरहेको छ। देशका अधिकांश भूभागमा हल्कादेखि मध्यम वर्षा भइरहेको छ।
पछिल्लो १२ घन्टामा स्याङ्जामा १११.४, चितवनको शक्तिखोरमा ९३.८, कास्कीको लामापाटनमा ५०, स्याङ्जाको मलुङ्गामा ४९.४ मिलिमिटर वर्षा भएको छ।
देशका केही स्थानमा मध्यम वर्षा हुँदा नै क्षतिसमेत भएका छन्। काभ्रेपलाञ्चोकको पनौतीमा एक महिला बेपत्ता छिन्। वैशाख २९ गते गते रोशी तटीय क्षेत्रमा भेलबाढी आएको थियो।
मौसमविद् विनोद पोखरेलले अझै दुई साता वर्षाको निरन्तरताको प्रक्षेपण गरेका छन्। विभिन्न मोडलमार्फत् हावापानी प्रक्षेपण गर्ने उनले जेठको १८–२० सम्मै वर्षा हुने बताएका हुन्।
पछिल्लो समय दाङ, घोराही, भैरहवा, जुम्ला, नेपालगञ्ज, जनकपुर, धनकुटा, विराटनगर, ओखलढुंगा, धरानमा सरदरभन्दा बढी वर्षा देखिएको छ।
ताप्लेजुङ, पोखरा, काठमाडौं, जिरी, लुम्ले, जोमसोम, डडेलधुरा, धनगढीमा सरदरभन्दा कम वर्षा देखिएको छ।
जल तथा मौसम विज्ञान विभाग
