० तपाईं एमालेको समानुपातिक कोटाबाट संविधानसभाको सदस्य हुँदा कांग्रेसबाट जननिर्वाचित संविधानसभा सदस्य हो।
० के तपाईं पार्टीको विधि, प्रक्रिया र मापदण्ड पुर्याएर केन्द्रीय सदस्य बन्नुभएको हो त ?
० गिरिजाबाबुले अख्तियार गर्नुभएको आर्थिक नीतिको परिणाम हो अहिले फस्टाएको नीजि क्षेत्र। यसैको सहउत्पादन हो तपाईं। विश्वको डलर अर्बपति बन्नमा कांग्रेसले अपनाएको खुला अर्थनीति र उदारिकरण नैं कारक छ, हैन र!
० चौधरी जी- आमोद प्रमोद, ऐश्वर्यसहितको धनकुबेरको मात्र इतिहास लेखिदैन, संघर्ष, योगदान, त्याग र निष्ठाले भरिपूर्ण सुदामाहरुको पनि लेखिन्छ भन्ने थाहा छ कि छैन ?
० सम्बन्धित क्षेत्रमा विज्ञता भएको भनिएको व्यक्ति सम्बन्धित क्षेत्रकै मन्त्री भएर आफ्नो व्यवसायलाई संरक्षण र प्रवर्द्धन गर्न मिल्छ ? यो ‘कन्फ्लिक्ट अफ इन्टरेस्ट’ भएन र ?
काठमाडाैँ । नेपाली कांग्रेसको केन्द्रीय कार्यसमिति बैठकमा पार्टीका वरिष्ठ नेता शेखर कोइरालामाथि कांग्रेस नेता विनोद चौधरीले उठाएका आठ सवालको जवाफ काँग्रेस नेता गुरुराज घिमिरेले दिएका छन्।
आसन्न १४ औँ महाधिवेशनमा सभापतिका प्रमुख दावेदार डा कोइरालाले मुख्य रुपमा बिनोद चौधरीको केन्द्रीय सदस्य बन्ने योग्यता थियो कि थिएन भनेर पार्टी सभापतिलाई प्रश्न गरेका थिए।
त्यसको प्रतिउत्तर रुवरुप डलरपति नेता चौधरीले आफूलाई हराउन मान्छे खटाएकोसहितका गम्भीर आरोप लगाएका थिए।
चौधरीले पार्टी बैठकमा पार्टीका सम्मानित नेतामाथि उठाएका आठ सवालले सबैको ध्यानाकर्षण भएको भन्दै नेता गुरुराज घिमिरेले चौधरी केन्द्रीय सदस्य नै कसरी बनेको हो ? भन्ने सवाल उठाइदिएका छन् ।
‘के तपाईं पार्टीको विधि, प्रक्रिया र मापदण्ड पुर्याएर केन्द्रीय सदस्य बन्नुभएको हो त ? सबभन्दा पहिले आफैंलाई प्रश्न गर्नोस् । तपाईं पार्टी विधान भत्काएर केन्द्रीय सदस्य हुनुभएको हो।’ भन्दै घिमिरेले सचेत समेत गराएका छन् ।
नेता घिमिरेको प्रतिजवाफ जस्ताको त्यस्तै
श्री बिनोद चौधरीजी, जय नेपाल !
तपाईँले हिजो नेपाली कांग्रेस केन्द्रीय कार्यसमितिको बैठकमा हाम्रो पार्टीका सम्मानित नेता डा. शेखर कोइरालामाथि उठाउनुभएका ८ वटा प्रश्नहरुले हामी सबैको ध्यानाकर्षण गरेको छ।
हुन त प्रश्न उठाउन पाउनु प्रजातान्त्रिक पार्टीले आफ्ना सदस्यका लागि उपलब्ध गराएको निर्वाध सुविधा हो। तर प्रश्न उठाउनेले कस्ता प्रश्न, किन र के का लागि उठाउने भन्ने कुरामा सधैँ सतर्कता अपनाउनुपर्छ र उठाइएका प्रश्नहरु जायज, बस्तुनिष्ठ, विधायक र तर्कसंगत हुनुपर्छ।
नेपाली कांग्रेस र नेपालको लोकतान्त्रिक आन्दोलनका निम्ति संस्था भैसकेको राष्ट्रिय र अन्तर्राष्ट्रिय रुपमैं प्रतिष्ठित परिवारको सदस्य तथा १४ औं महाधिवेशनको सभापति पदको निकटतम प्रतिस्पर्धी पार्टी नेतामाथि प्रश्न उठाउँदा चौधरीजीले निकै होसियारी अपनाउनुपर्थ्यो।
यसमा उहाँ पूर्ण रुपमा चुक्नु भएकोमा निकै दुःख लागेको छ। त्यसैले पार्टीको एउटा सदस्यको नाताले सर्वप्रथम उहाँप्रति खेद प्रकट गर्दछु !
अब उहाँका प्रश्नहरुमा जाउँ,
१- तपाईं केन्द्रीय सदस्य बन्दा कसैलाई आपत्ति होइन, तर कसरी बन्नु भयो भन्ने मुख्य प्रश्न हो।
के तपाईं पार्टीको विधि, प्रक्रिया र मापदण्ड पुर्याएर केन्द्रीय सदस्य बन्नुभएको हो त ? सबभन्दा पहिले आफैंलाई प्रश्न गर्नोस्।
त्यसमाथि देशको सर्वाधिक पुरानो प्रजातान्त्रिक पार्टीको केन्द्रीय सदस्य चुनिँदा प्रचलित वैधानिक व्यवस्थाको पालना गर्नुपर्छ कि पर्दैन ? कि तपाईंका निम्ति स्थापित व्यवस्था लागू नहुने हो ?
पार्टीका अरु साथीहरूका लागि बाध्यकारी र तपाईंका निम्ति अनावश्यक हो त ?
पार्टीले आजसम्म ‘पार्श्व प्रवेश’को नीति अख्तियार गरेको त हामीलाई थाहा छैन। त्यसैले तपाईं पार्टी विधान भत्काएर केन्द्रीय सदस्य हुनुभएको हो।
यो विषयमा तत्काल प्रश्न उठेको हो तर कसैले सुनेन। प्रजातन्त्र, विधिको शासन र देशका लागि सम्पूर्ण जीवन समर्पण गर्नुभएका पार्टी सभापति शेरबहादुर देउवाले समेत सुन्न भएन। पार्टी विधानको चीरहरण हुँदा समेत हामी तमासे बन्यौं।
२- हामी सबैलाई थाहा छ, बिक्रम खनाल जुँगाको रेखी नबस्तै राजनीतिमा लागेको कांग्रेसको सिनियर युवा हो। विद्यालयदेखि विश्वविद्यालयसम्म लामो समय नेबिसंघमा काम गरेको होनहार र कर्मठ नेता हो।
तपाईं एमालेको समानुपातिक कोटाबाट संविधानसभाको सदस्य हुँदा कांग्रेसबाट जननिर्वाचित संविधानसभा सदस्य हो।
वर्तमान नेपालको प्रजातान्त्रिक शासन प्रणाली स्थापना र पुनःस्थापनामा खनालको उर्वर जवानी, रगत, आँसु र पसिना खर्च भएको छ। उहाँको राजनीतिक व्यवस्थापन नैं नगरी तपाईं उहाँको निर्वाचन क्षेत्रमा चुनाव लड्न जाँदा उहाँको मर्ममा कति प्रहार भयो होला!
उहाँको राजनीतिक लगानी र त्यागको कति उपहास र अवमुल्यन भयो होला! अनुमान गर्नुभएको छ ? अनि यति सहजै अन्तर्घाति भन्दिने ? अनि अन्तर्घात भएको भए कसरी चुनाव जित्नु भयो त ?
चौधरी जी- आमोद प्रमोद, ऐश्वर्यसहितको धनकुबेरको मात्र इतिहास लेखिदैन, संघर्ष, योगदान, त्याग र निष्ठाले भरिपूर्ण सुदामाहरुको पनि लेखिन्छ भन्ने थाहा छ कि छैन ?
३- हामी नीजि क्षेत्रका मान्छेप्रति मात्र होइन, समग्र नीजि क्षेत्रप्रति नैं सकारात्मक छौँ। यसमा कोइराला परिवार अग्रणी छ। २०४६ सालपछि नेपाली कांग्रेसको प्रधानमन्त्रीको रुपमा गिरिजाबाबुले अख्तियार गर्नुभएको आर्थिक नीतिको परिणाम हो अहिले फस्टाएको नीजि क्षेत्र।
यसैको सहउत्पादन हो तपाईं। विश्वको डलर अर्बपति बन्नमा कांग्रेसले अपनाएको खुला अर्थनीति र उदारिकरण नैं कारक छ, हैन र!
४- राजनीतिक दलहरूले उद्योगी व्यवसायीहरुसँग चन्दा माग्नु अनौठो कुरा होइन। तर चन्दा दिने व्यक्तिले चन्दा दिँदा नेता बनाउनुपर्ने शर्त कहिल्यै राख्तैन।
संसारभरि कहीँ पनि राजनीतिक दललाई चन्दा दिनेहरू सबै नेता बन्दैनन्। अपवादको कुरा फरक हो।
तपाईंले कुन दलका, कसलाई, कहिले, कति चन्दा दिनुभएको छ, सार्वजनिक गर्नोस्, अनि बहस गरौंला। एउटा कुरा प्रष्ट हो, चन्दा लिए वापत तपाईंलाई नेता मान्न भने कोही बाध्य छैन।
५- हालका कांग्रेस कोषाध्यक्ष उमेश श्रेष्ठ शिक्षा र कृषि क्षेत्रको प्रतिष्ठित व्यवसायी हो। अहिले राजनीतिज्ञ पनि बन्नुभएको छ। उहाँको विषयमा छुट्टै वहस गरौंला। उहाँको कसैले अपमान गरेको छैन। झन् डा शेखर कोइराला त कसैलाई अपमान गर्ने व्यक्ति नैं होइन।
६- कोइरालालाई तपाईँले कसरी संकिर्ण भन्नसक्नुहुन्छ ? के तपाईंलाई मनपरेका विषय, घटना वा निर्णयलाई कोइरालाले वा हामी सबैले आँखा चिम्लेर ल्याप्चे लगाउनुपर्ने हो ? पार्टी भित्रको अव्यवस्था, विधानको अपहेलना, अनुशासन समितिका पक्षपाती कामकारबाही, देशको राजनीतिक परिस्थिति र सरकारका बारेमा आफ्नो धारणा राख्न नपाइने हो ? कि बोल्नु अघि तपाईंलाई सोध्नुपर्ने हो ?
७- राज्यको ओहोदा वा सरकारी पदमा बसेर अधिकारको दुरुपयोग गरी आफ्नो व्यवसायलाई फाइदा पुग्ने काम गर्न पाइन्छ त ?
सम्बन्धित क्षेत्रमा विज्ञता भएको भनिएको व्यक्ति सम्बन्धित क्षेत्रकै मन्त्री भएर आफ्नो व्यवसायलाई संरक्षण र प्रवर्द्धन गर्न मिल्छ ? यो ‘कन्फ्लिक्ट अफ इन्टरेस्ट’ भएन र ?
विज्ञता र अधिकारलाई सदुपयोग गरेको भए यस्तो प्रश्न उठ्थ्यो र ? विज्ञ मन्त्री हुनु नराम्रो कसले भनेको छ ?
८- कसले भनेको छ, जेलनेल भोगेको बाहेक कांग्रेस हुन पाईदैंन ? यसको उदाहरण त तपाईं आफैं होइन र ? मजाले कांग्रेस हुनुभएको छ।
आज क्रियाशील, भोली केन्द्रीय सदस्य बन्नुभएको छ। क्रियाशिल समेत नभई सांसद बन्नु भएको छ।
पार्टीका पुराना साथीहरूलाई अपमान गर्नुभएको छ। पार्टीको निर्णय प्रक्रियामा अनुचित प्रभाव पार्नुभएको छ। योभन्दा ज्यादती के हुन्छ ? अझै के के हुनुपर्ने ?
कांग्रेसको सदस्य भएर सर्वस्वहरण भएका, परिवार गुमाएका, पाटीको बास भएका र आजसम्म कुनै अवसर नपाएका हजारौं नेता कार्यकर्ता आज पनि जिवित छन्। के तपाईं ०८४ पछि, मात्रै पाँच वर्ष काँग्रेसको चौवन्नी सदस्य भएर बस्न सक्नुहुन्छ ?
त्यसैले चौधरी जी, विश्वको डलर अर्बपति व्यक्ति कांग्रेस हुँदा पार्टीका नयाँ पुराना सबै साथीहरूले गौरव गरेका थियौं, हाम्रो सम्पत्ति ठानेका थियौं र संसारलाई भनेका थियौं कि विनोद चौधरी पनि हाम्रो पार्टीमा छन्।
तर तपाईंले जुन स्तरमा उत्रेर पार्टीको आदरणीय नेता डा. शेखर कोइरालाप्रति विष वमन गर्नुभयो, हामीसँग खेद प्रकट गर्नु बाहेक बिकल्प रहेन !
जय नेपाल !
