धनगढी । नेकपा (एमाले) को ११औं महाधिवेशनका लागि प्रतिनिधि छनोट प्रक्रिया कैलालीमा पनि सकिएको छ। पाँचै वटा निर्वाचन क्षेत्रमा मतदानबाट प्रतिनिधि चयन गरिएको हो।
सुदूरपश्चिममा विशेष चासोका साथ हेरिएको कैलाली–५ मा सहमति नबनेपछि प्रतिस्पर्धात्मक निर्वाचन भएको थियो। यस क्षेत्रमा जिल्ला अध्यक्ष यज्ञराज ढुंगाना र पोलिटब्यूरो सदस्य तथा जिल्ला इन्चार्ज नारदमुनि राना प्यानलसहित मैदानमा उत्रिएका थिए।
ढुंगानालाई पूर्व मन्त्री दामोदर भण्डारीको साथ रहेको थियो भने रानालाई सुदूरपश्चिम इन्चार्ज तथा एमाले केन्द्रीय सचिव लेखराज भट्ट र नेता कर्णबहादुर थापाको समर्थन थियो। दुवै प्यानल केन्द्रमा अध्यक्ष केपी शर्मा ओली पक्षधर मानिन्छन्।
तर मतदानमा ढुंगाना समूहले पूर्ण जीत हात पारेको छ। नारदमुनि राना समूहका सबै उम्मेदवार पराजित भएका छन्।
निर्वाचन समितिले सार्वजनिक गरेको परिणामअनुसार खुला तर्फ धर्मराज पाठक, नेपालु चौधरी, विष्णुकुमार चन्द र यज्ञराज ढुंगाना विजयी भएका छन्। महिलातर्फ अम्बिका बिष्ट र रुकुमणी देवकोटा तथा युवा क्लस्टरमा तीर्थराज भट्टराई विजयी बनेका छन्।
राना समूहका सबै उम्मेदवार पराजित भएका छन्। धनगढी उपमेयर कन्दकलाकुमारी राना पनि महिला क्लस्टरमा सबैभन्दा कम मत ल्याउँदै पराजित भएकी छन्।
कैलाली नेकपा (एमाले)
