धनगढी । कैलाली निर्वाचन क्षेत्र नम्बर–२ मा नेकपा (एमाले)का उम्मेदवार सूर्यबहादुर थापाले चुनावी अभियानलाई तीव्र बनाएका छन्। उनले बर्दगोरिया गाउँपालिका–१ मा घरदैलो तथा टोलभेला गर्दै स्थानीयसँग प्रत्यक्ष संवाद गरेका छन्।
घरदैलोका क्रममा थापाले सुकुम्बासी समस्या समाधानलाई आफ्नो पहिलो प्राथमिकता बनाउने प्रतिबद्धता जनाए। लामो समयदेखि जग्गाको स्वामित्व नपाएर असुरक्षित जीवन बिताइरहेका परिवारको व्यवस्थापन आफू निर्वाचित भएलगत्तै सुरु गर्ने उनले बताए।
“सुकुम्बासी समस्या केवल नारा होइन, यो हजारौं परिवारको जीवनसँग जोडिएको विषय हो,” थापाले भने, “यसको स्थायी समाधानका लागि स्पष्ट योजना बनाएर काम गर्छु।”
बर्दगोरियाका विभिन्न टोलमा पुगेका थापाले स्थानीयको समस्या, गुनासा र अपेक्षा सुने। स्थानीयले मुख्य रूपमा लालपुर्जा अभाव, रोजगारी, शिक्षा, स्वास्थ्य सेवा र सडक पूर्वाधारका विषय उठाएका थिए।
एक स्थानीयले भने, “धेरै उम्मेदवार देख्यौं, धेरै वाचा पनि सुन्यौं, अब काम गर्ने नेतृत्व चाहिएको छ।”
थापाले जनताको विश्वासलाई निराश नपार्ने प्रतिबद्धता व्यक्त गर्दै विकास र समृद्धिका लागि स्पष्ट योजनासहित मैदानमा आएको बताए।
थापाका अनुसार सुकुम्बासी समस्या समाधानसँगै व्यवस्थित बसोबास, आधारभूत सेवा विस्तार र आर्थिक अवसर सिर्जना गर्ने योजना छ। सुकुम्बासीलाई कानुनी रूपमा जग्गा उपलब्ध गराई जीवनस्तर सुधार गर्ने लक्ष्य रहेको उनले बताए।
“जग्गाको स्वामित्वसँगै मात्रै नागरिकको भविष्य सुरक्षित हुन्छ,” उनले भने, “त्यसैले यो मेरो पहिलो प्राथमिकता हो।”
घरदैलो अभियानका क्रममा थापाले कैलाली–२ लाई कृषि, पूर्वाधार र रोजगारीको केन्द्रका रूपमा विकास गर्ने योजना सार्वजनिक गरे। युवालाई स्वदेशमै रोजगारी सिर्जना गर्ने, सडक र सिँचाइ विस्तार गर्ने तथा शिक्षा र स्वास्थ्य क्षेत्रमा सुधार गर्ने प्रतिबद्धता उनले जनाए।
घरदैलो अभियानमा स्थानीयको उल्लेख्य सहभागिता देखिएको थियो। स्थानीयले समर्थन रहने बताएका थिए।
प्रतिनिधिसभा निर्वाचन नजिकिँदै जाँदा कैलाली–२ मा चुनावी गतिविधि बढ्दै गएको छ। उम्मेदवारहरू आफ्ना एजेन्डासहित जनताको घरदैलोमा पुगिरहेका छन्। सुकुम्बासी समस्या समाधानलाई मुख्य मुद्दा बनाएका थापाको अभियानले भने स्थानीय तहमा विशेष चर्चा पाउन थालेको छ।
