काठमाडौं। अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमास्थलस्थित अध्यागन कार्यालयमा फेरि छापा मारेको छ।
आयोगले यसअघि छापा मारेरै विमानस्थल अध्यागन कार्यालयका तत्कालीन प्रमुख तीर्थराज भट्टराईलाई नियन्त्रणमा लिएर छानबिन थालेको थियो।
अध्यागन कार्यालयमा बिहीबार फेरि छापा मारेर केही महत्वपूर्ण कागजात नियन्त्रणमा लिएको छ। कागजात जफत गरेपछि अध्यागमन कार्यालयका कर्मचारी निकै अत्तालिएका छन्।
अत्तालिएका कर्मचारीलाई आचार संहिता पालना गर्न अध्यागमन कार्यालय प्रमुख विष्णुप्रसाद कोइरालाले शुक्रबार सकर्लुर जारी गरेका छन्।
सकुर्लरमा विदेश जाने यात्रुलाई कम्तीमा ‘ह्याभ अ नाइस जर्नी’ र नेपाल भित्रिने यात्रुलाई ‘वेलकम इन नेपाल, ह्याभ अ नाइस डे’ भन्ने उल्लेख गरिएको छ।
त्यसबाहेक रुखो व्यवहार नगर्ने, बोलीवचनमा मिठासपना प्रस्तुत गर्ने लगायत ६ बुँदे सर्कुलर जारी गरिएको छ।
पछिल्लो समय अख्तियार दुरुपयोग अनुसन्धान आयोगले त्रिभुवन विमानस्थलस्थित अध्यागमनका कर्मचारीमाथि विशेष निगरानी बढाएको छ।
यसअघि अध्यागमन विमानस्थलका तत्कालीन प्रमुख भट्टराईमाथि अनुसन्धान गर्न उनीसहित केही कागजात र उपकरण नियन्त्रणमा लिएको थियो। अहिलेको छापा पनि सोही कागजातको आधारमा थप प्रमाण जुटाउन गरिएको बताइएको छ।
खासगरी भिजिट भिसामा विदेश पठाउने र विदेश पठाई भिसा परिवर्तन गरी रोजगार दिलाउने शर्तमा सर्वसाधारण अहिले पनि ठगिन थालेपछि आयोगले चासो बढाएको छ।
भिजिटभिसा प्रकरणमा गृहमन्त्री रमेश लेखककै संलग्नता रहेको भन्दै प्रतिपक्ष रास्वपालगायतले निरन्तर विरोध गरेपछि पूर्वसचिव शंकरदास बैरागीको नेतृत्वमा छानबिन समिति बनाइएको छ।
उनको नेतृत्वको समितिलाई पनि प्रतिपक्षीले ‘दूधको साक्षी बिरोलो’ भन्दै विरोध गर्दै आएका छन्।
पछिल्लो समय भट्टराईलाई धरौटीमा रिहा गरिए पनि उनको स्थानमा विष्णुप्रसाद कोइरालालाई अध्यागन प्रमुखको जिम्मेवारी दिइएको छ।
तर, भिजिट भिसा प्रकरणको ठगी भने रोकिएको छैन। झन पछिल्लो समय भिजिट भिसामा विदेश जानेहरुबाट बढी रकम असुली थालिएको गुनासो अख्तियार दुरुपयोग अनुसन्धान आयोगसम्म पुगेको छ।
अहिले नेपालबाट भन्दा पनि विदेशमै बसेकाहरुले सेटिङ मिलाएर भिजिट भिसा ‘कारोबार’ गरिरहेको तमामौँ गुनासा आइरहेका छन्।
केही साताअघि मात्रै भिजिट भिसामा दुबै पठाउने भन्दै तयारी गरिएका केही महिलालाई अध्यागमन कार्यालयले फिर्ता पठाएको थियो भने, केहीको त भिसा नै रद्द गरेको थियो।
आयोगमा पछिल्लो समय परेको उजुरीकै आधारमा बिहीबार त्रिभुवन अन्तर्राष्ट्रिय विमानस्थलको अध्यागन कार्यालयमा छापा मारेको आयोग विश्वस्त स्रोतको दाबी छ।
आयोगको अनुसन्धान गर्ने एक टोलीले बिहीबार केही कागजात तथा उपकरण नियन्त्रणमा लिएर गएको अध्यागनका कर्मचारीले नै स्वीकारेका छन्।
