काठमाडौं । अर्थमन्त्री प्रकाशशरण महतले प्रतिनिधिसभाअन्तर्गतको अर्थ समितिमा सांसदहरुले राखेका जिज्ञासाको जवाफ दिँदै आफू व्यक्ति र पार्टीभन्दा माथि उठेर काम गरिरहेको बताएका छन्।
अर्थतन्त्रमा अहिलेको सूचकहरूका बारेमा छलफल गर्दै उनले आज सिंहदरबारमा बसेको समितिको बैठकमा अर्थतन्त्रको अवस्था र सूचकहरूका बारेमा जवाफ दिएका हुन्।
छलफलमा अर्थमन्त्री महतलाई सांसदहरुले वर्तमान अर्थतन्त्रकाबारेमा विभिन्न जिज्ञासा राखेका थिए।
सांसदहरुको जिज्ञासाको जवाफ दिँदै मन्त्री महतले भने, ‘स्वदेशमा अवसर छैन भने विदेशमा गएर आफ्नो उन्नति गर्ने ढोका बन्द गर्नु हुँदैन। तर हामी नेपालमै अवसरहरु सिर्जना गर्दै लैजाने हो। यो कुरालाई हामीले प्राथमिकतामा राख्नुपर्छ । युवाहरुको क्षमता छ, देशभित्रै प्रयोग हुनुपर्छ भन्ने मान्यतालाई हामी प्राथमिकतामा राख्छौं।’
उनले उत्पादन कसरी बढाउने भन्ने कुरालाई सरकारले प्राथमिकतामा राखेको पनि सुनाए।
‘नेपालमा अहिले जुन उद्योग व्यवसाय छ, त्यसमा धेरैजसो हाम्रो भ्यालु एडसिन कम छ। हामी चाहन्छौं, यो भ्यालु एडिसन ज्यादा भन्दा ज्यादा देशभित्र नै होस् भन्ने कुरा प्राथमिकतामा रहन्छ’, उनले भने, ‘नेपाली उद्योग व्यवसायीलाई प्रमोट गर्ने जस्ता कुरालाई आउँदो बजेटमा प्राथमिकता दिन्छौं, बढीभन्दा बढी नेपाली उद्योग व्यवसायलाई प्रवद्र्धन गर्ने नीतिमा हामी जान्छौं।’
उनले ज्ञानलाई सम्पूर्ण रुपमा उपयोग गरेर सिस्टममा भएको समस्यालाई धकेल्ने बताए।
अर्थमन्त्री महतले भने, ‘ज्ञान र अनुभवलाई म उपयोग गर्छु। म ठूलो स्वरमा कुरा गर्दिन। सुधारको आवश्यकता छ, यसमा इमान्दारिका साथ काम गर्छु। तर दुई महिनाभित्र मेरो ज्ञान र अनुभव उपयोग गरेर सारा समस्या सफाचट हुन्छ म भन्दिन। अवश्य पनि नीति कार्यक्रममा क्रमशः सुधारहरु गरिनेछन्। धेरैजसो यसपाली गरिनेछ, कतिपय कुरा क्रमशः गरिँदै लगिने छ।’
कार्यान्वयन हाम्रो मूल चुनौति भएको बताउँदै उनले भने, ‘९ महिनापछि स्रोत रिलिज गर्दिनुपर्यो, अब हामी ठेक्का लगाउँछौं भनेर आउँछन् । त्यसलाई मैले रोकिदिएको छु। ९ महिनासम्म के गरेर बसे?’
उनले बजेटपछि लगत्तै असार मसान्तसम्मको काम छँदैछ, गृहकार्य तत्काल सुरु गर्ने बताए। यी कुराहरु यो समयभित्र गरिसक्ने भनेर कार्यतालिका बनाउने र यसबारे गृहकार्य भइरहेको बताए।
मन्त्री महतले भने, ‘यो भयो भने हाम्रो पूँजीगत खर्चको प्रभावकारिता बढ्छ। पूँजी प्रवाह बढ्छ, यसले आर्थिक वृद्धिदरलाई मद्दत गर्छ भन्ने विश्वास मैले लिएको छु। समग्र उद्योग व्यवसाय, समग्र अर्थतन्त्रको कुरा गरेको हुँ, एउटा व्यक्ति, व्यवसायको फाइदाका लागि मबाट केही हुँदैन।’
पूँजीगत खर्च, राजश्व परिचालनले गुणस्तरीय उत्पादन यसबाट हुन्छ कि हुँदैन भन्नेमा आफ्नो सम्पूर्ण ध्यान केन्द्रित हुने उनले सुनाए।
‘मैले आफ्नो टिममा यी कुरा बलियोसँग राखेको छु । सिस्टमबाट आएका कुरा ठीक छन् कि छैनन यी सबै कुरा दिनरात म हेरिरहेको छु, यहाँ राजनीतिक दल यो वा त्यो भनेर हेरेको छैन । यहाँ देश र जनताको कुरा छ । म व्यक्ति र पार्टीभन्दा माथि उठेर काम गर्छु’, उनले भने।
अहिले राजस्व कम उठेकाले त्यही आधारबाट माथि उठेर कामको सुरुवात गरेको उनले बताए। राजस्व घटेको स्थानमा आफूले हेरिरहेको पनि उनले सुनाए। ती कुरालाई सुधार गर्ने पनि उनले जानकारी गराए। उनले यो आर्थिक वर्षमै गति लिएर ३५–४० प्रतिशत बढी राजस्व उठाउन सक्छु भन्ने अवस्था नरहेको पनि बताए।
महतले भने, ‘वैदेशिक ऋणले हाम्रो अर्थतन्त्रलाई सहयोग पुगेको छ कि छैन? यसको समीक्षा हुन जरुरी छ। यो समीक्षा गरेर हाम्रो आवश्यकताअनुसार ल्याउन आजको भोलि नै सम्भव छैन। यसको पनि सीमा छ, योसँगै हामीले खर्च गर्ने क्षमता पनि देखाउन आवश्यकता छ।’
साउँ व्याज एकदमै बढ्दै गएको बताउँदै उनले भूकम्पका बेलामा लिएको ऋणको पनि भुक्तानी भइनसकेको जानकारी गराए।
ऋण भुक्तानीमा ध्यान केन्द्रित गर्न थाल्यो भने साधारण र पूँजीगत खर्चमा दबाब सिर्जना हुने उनले बताए।
ुप्रशासनिक खर्चको सीमा छ, सामाजिक सुरक्षा खर्च हटाउन सक्दैनौं। सार्वजनिक स्वास्थ्य शिक्षाको लगानी कटाउन सक्दैनौं। यस बीचमा हामी ऋण भुक्तानीको दायित्वबाट भाग्न सक्दैनौुं, उनले भने, ‘यो जति दबाब बढ्दै जान्छ, हाम्रो आन्तरिक आवश्यकतामा दबाब पर्छ। पूँजीगत खर्च गर्नुपर्ने चौतर्फी मागलाई सम्बोधन गर्न हामीसँग श्रोत सीमित छ। यो असन्तुलनको बीच हामीले काम गर्नुपर्ने आवश्यकता छ। मेरो आधारसहितको तर्कलाई माननीयज्यूहरुले बुझिदिनु हुनेछ।’
बैठकमा एमालेका सूर्यबहादुर थापा, पदम गिरी, राष्ट्रिय स्वतन्त्र पार्टीका स्वर्णिम वाग्ले, विराजभक्त श्रेष्ठ, नेकपा एकीकृत समाजवादी पार्टीका भवानी खापुङ, राष्ट्रिय स्वतन्त्र पार्टीका ज्ञानेन्द्र शाहीलगायतले अर्थमन्त्री महतलाई प्रश्न गरेका थिए।
अर्थ समितिको बैठक नेपाली कांग्रेसका सांसद एवं समितिका ज्येष्ठ सदस्य सन्तोष चालिसेको सभापतित्वमा बसेको थियो।
