Logo
१५ चैत्र २०८०, बिहीबार

अमेरिकाबाट जब पार्सलमा गाँजा आयो !

अक्षरपाटी
२०७९ भदौ २१ , मंगलबार ०६:०९ मा प्रकाशित

काठमाडौं। अमेरिकाबाट आउने पार्सल पक्कै केही बहुमुल्य चिज हुन्छ होला । किनकी केही नेपालीका सपनाको गन्तव्य, त्यसमाथि सम्भ्रान्त मुलुक, अमेरिका।

नेपाली नागरिकले त्यहाँबाट आउने उपहार नौलो र रोचक हुने अनुमान गर्नु स्वभाविक हो तर त्यही मुलुकबाट गाँजा पार्सल गरी सरकारी निकाय हुलाकमा आउँछ भन्ने कुरा धेरैलाई थाहा नहुनसक्छ। बाह्य मुलुकबाट यसरी सानो परिमाणामा लागुऔषध भित्रिएका घटना बेलाबेलामा सुनिएको हो।

यसपटक भने झण्डै दुई किलो गाँजा त्यसैगरी हुलाक हुँदै नेपाल भित्रिएको छ। उक्त पार्सल अनुसन्धानका लागि प्रहरीले बरामद गरी त्यसमा संलग्न रहेका तीन व्यक्तिलाई पक्राउ गरेको छ।

त्यसका मुख्य कारोबारी को हुन् भन्ने विषयमा भने अझै अनुसन्धान बाँकी नै रहेको लागुऔषध नियन्त्रण ब्यूरोका प्रवक्ता प्रहरी उपरीक्षक योगेन्द्रकुमार खड्काले जानकारी दिए।

घटना सोमबारको हो। गोश्वारा हुलाक कार्यालय डिल्लीबजारमा अमेरिकाबाट गाँजा हालेर उपहारका रुपमा पार्सल आयो। कुनै व्यक्तिको नाममा उपहार भनेर उक्त पार्सल आएको थियो। हुलाकमा प्रहरी टोली खटाइँदै आएको छ। उक्त पार्सल मेसिनमा स्क्रिनिङ गर्दा असहज देखियो।

“अनुसन्धानका क्रममा भित्र गाँजा भएको खुल्यो, त्यसपछि अनुसन्धानलाई थप बलिायो बनाउँदै मान्छे समाउन लाग्यौँ”, खड्काले भने्, “लिन आउने व्यक्तिलाई नियन्त्रणमा लिएर थप व्यक्ति खोज्न थाल्यौँ।”

हुलाकमा सो पार्सल लिन काभ्रेको माण्डनदेउपुर नगरपालिका–७ का २८ वर्षीय मनोज राई आए। हुलाकबाट पार्सल रिसिभ गर्ने बित्तिकै उनी पक्राउ परे। त्यहाँ थियो दुई किलो गाँजा।

सुरुमा उनले केही कुरा खुलाएनन्। विस्तारै सोधपुछका क्रममा राईबाट काठमाडौँ महानगरपालिका–१ नक्सालका ३० वर्षीय अङ्कितकुमार श्रेष्ठ पनि यसमा संलग्न रहेको कुरा खुलेपछि काठमाडौँको खुस्बुबाट पक्राउ परे। थप अनुसन्धान गर्दै जाँदा मनोजलाई ३० हजार दिने शर्तमा राहुल र अङ्कीतले परिचालन गरेको पत्ता लाग्यो।

तत्कालै प्रहरीले काठमाडौँको नक्सालबाट क्षेत्रीलाई पनि पक्राउ ग¥यो। यो पार्सल उनीहरुमा मात्रै सीमित छैन। उनीहरु पहिलो तहका संलग्न व्यक्ति हुन्। गाँजा मगाउने मुख्य व्यक्ति को हुन् प्रहरीले अझै खुलाएको छैन तर पार्सल तीनै जनाको मिलेमतोमा भित्राइएको पाइएको छ।

त्रिपक्षीय योजना

धेरै पहिलेदेखि नै राहुल र अङ्कित साथी थिए। उक्त पार्सल मगाउने राहुलले अङ्कितको नाममा मगाउन प्रस्ताव गरेर तर राहुलले पक्राउ पर्ने डरले मानेन् । बरु चिनजानको अर्को साथीको नाम लिँदै उनको नाममा मगाउन प्रस्ताव गरे। उनको नाम हो मनोज राई। मनोजको नाममा पार्सल मगाउने अङ्कित र राहुलको सहमतिमा मनोज पनि राजी भए।

विगतमा मनोज ठमेलको एक पबमा काम गर्थे। उक्त पबका अङ्कित नियमित ग्राहक थिए। विस्तारै उनीहरुको चिनाजान साथीमा परिणत भयो। बन्दाबन्दीमा समयमा पब बन्द भएपछि राईलाई अङ्कितले नयाँ जागीर लगाइदिएपछि उनीहरुको सम्बन्ध घनिष्ट भयो। त्यसैले उनीहरुले मनोजलाई प्रयोग गरेर उनको नाममा पार्सल मगाउन सफल भएका थिए।

१५ जना सार्वजनिक

उनीहरुसहित विभिन्न मितिमा लागुऔषधसहित पक्राउ परेका १५ जनालाई प्रहरीले आज सार्वजनिकसमेत गरेको छ। उनीहरुलाई लागुऔषध नियन्त्रण ऐन २०३३ अनुसार अदालतबाट म्याद थप गरी अनुसन्धान जारी रहेको प्रहरीको लागुऔषध नियन्त्रण ब्यूरो काठमाडौँले जनाएको छ।

प्रहरीले ललितपुरको भोलाखेलका सञ्जय कपाली, र रामेछापको मन्थलीका २७ वर्षीय कुमार तामाङलाई नियन्त्रित लागुऔषध ब्रुप्रोनोर्फिन ३१ एम्बुपल, डाइजेपाम ३१ एम्पुल र फेनारगन ३० एम्पुलसहित पक्राउ गरेको हो।

यस्तै ललितपुरका २९ वर्षीय अनिश महर्जन तथा सप्तरीका धर्मदेव रामलाई पनि पक्राउ गरिएको प्रहरीले जनाएको छ। खैरो हेरोइनसहित ललितपुरका प्रताप कार्की, पाँचथरका भुवन विक र देङ्हाङ नेम्वाङ पनि पक्राउ परेका छन्।

यस्तै काठमाडौँको माकलबारीका उत्सव घिमिरे, भोजपुरका दोर्ची शेर्पालाई पनि खैरो हेरोइनसहित र उक्त खैरो हेरोइन कारोबारमा संलग्न भोजपुरका फुर्लामी शेर्पा, अप्सरा राजवंशी, नौसाद आलम पक्राउ परेका छन्।

नीहरुबाट १० लाख ४० हजार नगदसमेत बरामद गरिएको छ। प्रहरीले १५ जनाबाट खैरो हेरोइन २८७.५ ग्राम, गाँजा दुई किलो, अन्य लागुऔषध २५२ एम्पुल, डिजिटल तराजु, मोबाइललगायत सुामगीसमेत बरामद गरेको छ।

पार्सलमा गाँजा लागूऔषध