Logo
२३ मंसीर २०७९, शुक्रबार

हरिवंश भन्छन्ः ‘श्रीमतीको साथले सक्रिय छु’

अक्षरपाटी
२०७९ कात्तिक २१ , सोमबार ०१:११ मा प्रकाशित

करिब पाँच दशकदेखि नेपाली कलाकारिता क्षेत्रमा निरन्तर सक्रिय नाम हो, हरिवंश आचार्य।

उमेरले ६५ वर्ष पार गरेका आचार्यको सक्रियतामा अझै युवाकोभन्दा कम छैन।

आचार्य अझै पनि रङ्गमञ्चका साथै चलचित्र निर्माण तथा अभिनयमा उत्तिकै सक्रिय छन्। विज्ञापन, म्युजिक भिडियोसँगै फिल्ममा पनि उत्तिकै देखिन्छन्।

लामो समयसम्म यस क्षेत्रमा सक्रिय हास्यकलाकार आचार्यले श्रीमति मीरा आचार्यको निधनपछि करिब एक वर्ष सक्रिय जीवन बिताएनन्।

अर्थात्, सो अवधिभर चलचित्र लगायतमा काम गरेनन्। तर रमिला पाठकसँग दोस्रो विवाहपछि भने उनी पुरानै लयमा फर्किएका छन्। काममा उसैगरी जोश र जाँगरका साथ काम गरिरहेको उनको भनाइ छ।

मह सञ्चारबाहेकका प्रोजेक्टमा निकै कमै देखिने आचार्य अभिनित पछिल्लो चलचित्र ‘महापुरुष’ प्रदर्शनरत छ। यसले दर्शकहरुबाट सकारातमक प्रतिक्रिया समेत पाइरहेको छ।

‘महापुरुष’ चलचित्र एकलपुरुषको कथामा आधारित छ। कथाका केही प्रसङ्गहरु आचार्यको जीवनसँग पनि मेल खान्छ।

“मेरो दोस्रो विवाह हुने प्रसङ्गबाहेक फिल्मको कथा फरक छ। एक्लोपनले निम्त्याउने समस्या भने मिल्न सक्छ”, उनले भने, “वास्तविक जीवनमा मेरो सन्तानले नै दोस्रो विवाहप्रति देखाएको सद्भाव मेरो लागि प्रेरणा बन्यो।”

सन्तानले पनि आफ्नो अभिभावकको इच्छा बुझे अभिभावक सुखीसँगै खुसी रहन सक्ने उनको भनाइ छ।

आचार्यले एक्लोपनले जीवनमा समस्या ल्याउने र आफू पनि शोकमा हुँदा झन्डै एक वर्ष काम गर्न नसकेको बताउँछन्।

“तर अहिले मेरो काममा देखिएको सक्रियता श्रीमतीकै कारण सम्भव भएको हो”, अभिनेता आचार्यले भने, “उहाँको साथ र सहयोगले नै म अहिले सक्रियतापूर्वक काम गर्न सकेको छु।”

महापुरुष चलचित्र हेरेपछि दर्शकले दिएको प्रतिक्रियाले आफूले दोस्रो विवाहको समय स्मरण गरेको उनले बताए।

“दोस्रो विवाहको निर्णय लिन कठिन हुन्छ । आफ्नो खुसी हेर्ने हो कि सामाजिक प्रतिष्ठा भन्ने प्रश्नले द्विविधा उत्पन्न गराउँछ”, उनले भने, “यो द्विविधामा म मात्रै होइन अन्यमा पनि रहेको पाएँ।”

अभिनेता आचार्य प्रायः कार्यक्रममा श्रीमतिसँगै पुग्छन्। उनी हालै मात्रै सपत्नी संयुक्तराज्य श्रीमतिसँगै अमेरिका पुगेका छन्।

महापुरुष चलचित्रमा उनले दुई छोराको पिताको भूमिका निभाएका छन्। कान्छो छोराको विवाहको तयारी हुँदै गर्दा आफै प्रेममा परेपछि आउने परिस्थितिलाई मुख्य कथा बनाइएको छ।

परिवारसँगै हुँदा पनि सन्तानले समय नदिँदा बुबाआमाले कसरी एक्लोपन महसुस गर्छन् भन्ने विषयवस्तुलाई चलचित्रमा उठान गरिएको छ।

फिल्मका लेखक तथा निर्देशक प्रदीप भट्टराईले शीर्षक छनोटपछि हरिवंश आचार्य बोहक अरु कलाकारलाई उक्त भूमिका दिन नसकिएको बताए।

चलचित्रमा आचार्यसँगै मदनकृष्ण श्रेष्ठ, गौरी मल्ल, राजाराम पौडेल, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार लगायतका कलाकारको अभिनय छ।

हरिवंश