काठमाडौं। स्ट्रेट अफ होर्मुजमा तीनवटा तेल ट्याङ्करमाथि भएको आक्रमणपछि अमेरिकाले इरानका ८० भन्दा बढी सैन्य लक्ष्यमा शक्तिशाली हवाई आक्रमण गरेको जनाएको छ।
अमेरिकी सेनाको केन्द्रीय कमाण्ड (सेन्टकम)का अनुसार मंगलबार गरिएको आक्रमणमा इस्लामिक रिभोलुसनरी गार्ड कर्प्स (आईआरजीसी)सँग सम्बन्धित ६० भन्दा बढी साना डुङ्गा, क्षेप्यास्त्र प्रक्षेपण स्थल तथा सैन्य कमाण्ड केन्द्रलाई निशाना बनाइएको हो।
सेन्टकमले आक्रमणमा ८० भन्दा बढी सैन्य लक्ष्य समेटिएको दाबी गरे पनि कुन–कुन स्थानमा कारबाही गरिएको हो भन्ने खुलाएको छैन।
साथै, आक्रमणबाट भएको क्षति वा मानवीय हताहतीबारे पनि कुनै आधिकारिक विवरण सार्वजनिक गरिएको छैन।
स्ट्रेट अफ होर्मुज विश्वको सबैभन्दा महत्वपूर्ण समुद्री व्यापारिक मार्गमध्ये एक हो।
विश्वको ठूलो परिमाणमा कच्चा तेल यही मार्ग हुँदै ढुवानी हुने भएकाले यस क्षेत्रमा बढेको तनावले अन्तर्राष्ट्रिय ऊर्जा बजार र क्षेत्रीय सुरक्षामा प्रत्यक्ष असर पार्न सक्ने विश्लेषण गरिएको छ।
तेल ट्याङ्करमाथिको आक्रमणपछि अमेरिकाले गरेको यो सैन्य कारबाहीले अमेरिका–इरानबीचको तनाव थप चर्किने संकेत दिएको छ।
अब इरानको प्रतिक्रिया र अन्तर्राष्ट्रिय समुदायको कदमलाई चासोका साथ हेरिएको छ।
होर्मुज स्ट्रेट
