ढाका । बंगलादेशको हजरत शाहजलाल अन्तराष्ट्रिय विमानस्थलमा बम राखिएको धम्की पछि ६ घण्टाको आपत्कालीन घोषणा गरिएको छ ।
बिहान आएको एक बिमानमा बम राखिएको धम्की आए पछि बुधबार दिउँसो करिब १२ बजेसम्म त्यहाँ कुनै शंकास्पद बस्तु नभेटिएको जनाइएको छ ।
ढाका ट्रिब्युनका अनुसार बिहान ५:३० बजे विमानस्थल नियन्त्रण कक्षमा रोमबाट आउँदै गरेको बंगलादेश विमान एयरलाइन्सको बिजी ३५६ को विमानमा बम रहेको सन्देश आएको थियो । र, यो पनि भनिएको थियो कि त्यो बम जुन जुनसुकै बेला विस्फोट हुनसक्छ । सो धम्कीको जानकारी तुरुन्तै उच्च अधिकारीहरूलाई पठाइयो।
क्याबका अध्यक्ष र कार्यकारी निर्देशक समूह क्याप्टेन कमरुल इस्लाम र अन्य वरिष्ठ अधिकारीहरू विमानस्थलमा पुगेका थिए। र, सम्पूर्ण क्षेत्रलाई तुरुन्तै व्यापक सुरक्षा घेरा अन्तर्गत राखिएको थियो। उक्त कार्यमा वायुसेनाको बम डिस्पोजल टोली, क्विक रेस्पोन्स टिम (क्यूआरटी), फायर सर्भिस र अन्य कानून प्रवर्तन एजेन्सीहरुको सहभागिता रहेको थियो ।
करिब २०० यात्रु र चालक दलका सदस्य सवार उक्त विमानले बिहान ९:३५ बजे आपतकालीन अवतरण गरेको थियो । खोजी सुरु हुनु अघि यात्रुहरूलाई सुरक्षित रूपमा बाहिर निकालिएको थियो। ‘हामीले यो क्षेत्रलाई सुरक्षित राखेको सुनिश्चित गर्यौं र विस्तृत खोजी गर्यौं,’ एचएसआइएका उड्डयन सुरक्षा निर्देशक विंग कमाण्डर जहाँगिर हुसेनले भने, ‘हरेक सम्भावित खतरालाई लगनशीलताका साथ सामना गरियो।’
तर, बम डिस्पोजल टोलीले बिहान ११:३० बजेसम्म विमान र दुईवटा शंकास्पद झोलाको होसियारीपूर्वक खोजी गरे पनि असामान्य बस्तु केही पनि फेला पार्न सकेनन । र, अहिले दिउँसोबाट उडान सुरक्षित घोषणा गरियो र सामान्य सञ्चालनमा पुनः सुरु भएको छ ।
बंगलादेश
