काठमाण्डौ । त्रिभुवन अन्तर्राष्ट्रिय विमानस्थलमा उडान कटौती भएसँगै भैरहवामा रहेको गौतमबुद्ध अन्तर्राष्ट्रिय विमानस्थलमा चहलपहल बढेको छ ।
यसअघि यात्रु नपाउने लगायतका समस्या देखाएर भैरहवाबाट उडान नगरेका वायु सेवा कम्पनीहरूले नियमित तालिका बनाएर उडान गर्न थालेका छन् । चार वटा कम्पनीले नियमित उडान शुरू गरिसकेका र भोलिदेखि कतार अरवेजले पनि उडान शुरू गर्ने गौतमबुद्ध अन्तर्राष्ट्रिय विमानस्थल कार्यालयले जनाएको छ । अहिले थाई एअर एशिया, नेपाल वायु सेवा निगम, जजिरा एअरवेज र फ्लाई दुबईले नियमित उडान शुरू गरिसकेका छन् ।
भैरहवा विमानस्थल अहिले १८ घण्टा सञ्चालन भइरहेको छ । विमानस्थलमा एक घण्टामा दुई वटा अन्तर्राष्ट्रिय विमान सञ्चालन गर्न सक्ने क्षमता छ । विश्वका ठूला एअरलाइन्सले नियमित उडान थाल्नु भनेको भैरहवा विमानस्थाल विश्व एरोनटिकल कम्युनिटीको पहिचानमा पर्नु रहेको नागरिक उड्ययन प्राधिकरणका सूचना अधिकारी ज्ञानेन्द्र भुलले बताउनुभयो ।
यस्तै नेपाल उद्योग वाणिज्य महासङ्घका अध्यक्ष चन्द्रप्रसाद ढकालले भैरहवाको अन्तर्राष्ट्रिय विमानस्थल सञ्चालनमा आउनु सुखद पक्ष रहेको बताउनुभयो । भैरहवामा उडान शुरू भएपछि विकल्प र प्रतिस्पर्धा दुवै भएर अहिले बढेको हवाई भाडा पनि घट्ने उहाँको भनाइ छ ।
२०७९ साल जेठदेखि सञ्चालनमा आएको गौतमबुद्ध अन्तर्राष्ट्रिय विमानस्थलमा तत्कालै कुवेतको जजिरा एअरवेजले उडान थालेको थियो । जजिरासँगै नेपाल एअरलाइन्स र हिमालय एअरलाइन्सले पनि केही समय उडान गरे पनि केही समयमै उडान रोकेका थिए ।
अहिले त्रिभुवन विमानस्थलको उडान कटौती भएका बेला मात्र नभई नियमित सञ्चालनका लागि वातावरण बनाउनुपर्ने व्यवसायीहरू बताउँछन् । भैरहवामा अन्तर्राष्ट्रिय उडान नियमति हुँदा लुम्बिनीसँगै कर्णाली, सूदूरपश्च्मि र गण्डकी प्रदेशका नागरिकलाई पनि सहज हुनेछ ।
