काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले झापा-५ बाट उम्मेदवार हुँदै आफ्नो बाचापत्र सार्वजनिक गरेका छन्।
शाहले आफ्नो बाचापत्रमा भूमि व्यवस्थापन र स्वास्थ्य सुधारका स्पष्ट योजना प्रस्तुत गरेका छन्।
शाहका अनुसार ‘झापा-५ का भूमिहीन, सुकुम्बासी तथा अव्यवस्थित बसोबासको समस्यालाई न्यायोचित र दिगो समाधान गर्न, रास्वपा सरकारले गठन भएको १०० दिनभित्र आयोग बनाइने र १००० दिनभित्र समाधान गरिनेछ।’
साथै, बाँझो जमिनको सदुपयोगका लागि ‘ल्याण्ड बैंक’ को व्यवस्था गरिने छ। ऐलानी जग्गा र अभिलेख नभएका जमिनहरूको नापी, नक्सा र अभिलेखिकरण पनि सम्पन्न गरिने शाहले बताएका छन्।
स्वास्थ्य सुधारका योजना
दमक अस्पताललाई पहिलो चरणमा ३०० शैयाको स्तरोन्नत अस्पताल बनाउने योजना सार्वजनिक गरिएको छ।
विपन्न, असहाय र बेवारिसे बिरामीका लागि कुल शैयाको १० प्रतिशत निःशुल्क उपचार उपलब्ध गराउने कानुनी व्यवस्थाको कार्यान्वयन पनि शाहले बाचापत्रमा उल्लेख गरेका छन्।
शाहले आफ्नो बाचापत्रको कार्यान्वयन आफै नेतृत्व गर्ने प्रतिबद्धता जनाएका छन्।
