ओ ! आगोको प्रथम प्रयोगकर्ता नियान्डरथल,
कुन अभिप्रेरणाले तिमीले आगो पत्ता लगायौ ?
र,
सभ्यताको आदिम इतिहासलाई सुनौलो भविष्यतिर डोर्यायाै ?
तिमीले आगो पत्ता नलगाएको भए,
के वैदिक स्रस्टाहरूले आगो पार्ने मन्त्र लेख्थे र ?
के आर्यहरुले अग्न्यास्त्र कल्पन्थे र ?
के पश्चिमी मिथकमा आगो चोर्ने देवता जन्मन्थे र ?
के बालकृष्ण समजीले आगो र पानी खन्डकाव्य लेख्थे र ?
आइन्स्टाईनको इ= एमसी स्क्वायरको सिद्धान्तमा पनि आगोकै बीजरूप देखिन्छ नी
यसकारण ! आगोको आरनमा तिमी,
सभ्यताको महानायक हौ,
सभ्यताको शिलखानामा तिमी,
अग्नि गायक हौ,
त्यसैले त सभ्यताको अग्निवेदीमा,
तिमीलाई सम्झिरहेको छु,
त्रासद हिमयुगको अन्त्यपछि,
क्याम्प फायर गरिरहेको छु,
ठकठक ठकठक ठोक्किंदा पाषाण औजार !
आगोका झिल्काहरु झल्कियो र त !
तिम्रो आदिम चेतना आगोसंग खेल्नसक्यो !
हे अग्निपूजक निया्न्डरथल !
हे अग्नि सर्जक नियान्डरथल !
आगोको यज्ञवेदिमा म
अग्निमिडे पुरोहितम् को राग अलापिरहेको छु !!
अग्निमिडे पुरोहितम् को राग अलापिरहेको छु !!
तिमीले पत्ता लगाएको आगो,
मृत्यु बनेर बज्रियो जापानको नागाशाकि र हिरोसिमामा,
इराक र युक्रेनमा,
आजपनि
अमेरिका र रुसको अणुभट्टिमा
आगो उत्पादन हुंदैछ महाकाल समान,
र
अहंकारको अग्नियुद्धमा आगो सभ्यता नासिंदै गर्दा,
म भने विश्वशान्तिको कामना गर्दैछु,
नियान्डरथललाई सम्झेर
ॐ अग्नाय स्वाहाको आलापमा,
अग्निमिडे पुरोहितम् को आलापमा
नियान्डरथल गुन्जिन्छ महान आविस्कारक बनेर
किनभने नियान्डरथलको आगो विनासको लागि थिएन,
सिर्जनाको लागि थियो
नियान्डरथलको आगो सभ्यता
नियान्डरथलको आगो सभ्यता !!
